सडक अर्जुनी : सडक अर्जुनी वन परिक्षेत्रात गेल्या अनेक वर्षांपासून जंगल परिसराला लागून काही लोकांनी अतिक्रमण करण्याचा सपाटा सुरू केला होता. यामुळे जंगल क्षेत्र कमी होत चालले होते. याचीच दखल घेत वन विभागाने याविरोधात धडक मोहीम सुरू केली असून, वन विभागाच्या जागेवर अतिक्रमण करणाऱ्यांवर वन कायद्यानुसार गुन्हा करून कारवाई करण्यास सुरुवात केली आहे.
दोन दिवसांपूर्वी डुग्गीपार येथील एका शेतकऱ्याने अतिक्रमण करण्याचा प्रयत्न करून वन विभागाची काही जमीन बळकाविण्याचा प्रयत्न केला. ही बाब वन विभागाच्या निदर्शनास येताच त्यांनी या शेतकऱ्याला पकडून त्याच्यावर वन कायद्यानुसार गुन्हा दाखल केला. पंधरा दिवसांपासून रेंगेपार सहवनक्षेत्रात सात हेक्टर जमिनीचे अतिक्रमण काढून त्या ठिकाणी वन विभागाने रोपवण केले आहे. तालुक्यातील सतीटोला, डव्वा, खजरी, कोसमतोंडी, कोकणा, वडेगाव, सिंदीपार, मनेरी या ठिकाणच्या जवळपास १७ हेक्टर जमिनीवरील अतिक्रमण काढून वन विभागाने त्या ठिकाणी रोपवन केले आहे. वन विभागाच्या जमिनीवर अतिक्रमण करणाऱ्यांची यापुढे गय केली जाणार नसल्याने सडक अर्जुनीचे वनपरिक्षेत्र अधिकारी राजेश पाचभाई यांनी सांगितले. वन जमिनीवरील अतिक्रमण हटविण्यासाठी सहवनक्षेत्र अधिकारी संतोष घुगे, शैलेश पारधी, नरेंद्र वाढई, भास्कर प्रधान, वनरक्षक आनंद बनसोड, मंजूषा पटले, शिवेंद्र पवार, विनोद आडे, संजय चव्हाण, नरेश पथोडे, अश्विनी साखरे, दुर्गा अगडे आदी कर्मचारी कारवाही करीत आहे. यामुळे अतिक्रमणधारकांचे धाबे दणाणले आहे.