शहरात स्वच्छतेचे परीक्षण होणार

शहरातील स्वच्छता विषयक काय सोयी उपलब्ध आहेत व शहरवासीयांना आणखी काय हवे आहे हे ...

स्वच्छता सर्वेक्षण १७ पासून : शहरवासीयांच्या प्रतिक्रिया घेणार कपिल केकत गोंदियाशहरातील स्वच्छता विषयक काय सोयी उपलब्ध आहेत व शहरवासीयांना आणखी काय हवे आहे हे जाणून घेण्यासाठी शहरात येत्या १७ ते १९ जानेवारी दरम्यान स्वच्छता सर्वेक्षण केले जाणार आहे. केंद्र शासनाच्या गुणवत्ता नियंत्रण विभागाकडून हे सर्वेक्षण केले जाणार असून यासाठी त्यांचे विशेष पथक शहरात येणार आहे. अवघ्या देशाला स्वच्छ व सुंदर बनविणयासाठी केंद्र शासनाकडून स्वच्छता मिशन राबविले जात आहेत. त्यातंर्गत टप्याटप्याने काही ना काही नवनवे प्रयोग करून देशवासीयांत स्वच्छतेबाबत जागरूकता आणण्याचे शासनाचे प्रयत्न आहेत. प्रत्येक व्यक्ती स्वच्छतेप्रती आपली जबाबदारी जाणून घेतल्याशिवाय शासनाचे हे प्रयत्न फलितास येणार नाहीत. त्यामुळे देशवासीयांना जागरूक करून त्यांचा सहभाग मिळवून घेण्यासाठी ही सर्व खटाटोप सुरू आहे. यात प्रत्येक नागरिकांना काय हवे आहे हे सुद्धा जाणून घेणे तेवढेच गरजेचे आहे. यातूनच स्वच्छता सर्वेक्षण हा नवा प्रयोग केला जात आहे. केंद्र शासनाच्या गुणवत्ता नियंत्रण विभागाकडून हा प्रयोग केला जाणार असून यांतर्गत राज्यातील ४४ शहरांची निवड करण्यात आली आहे. विशेष म्हणजे स्वच्छता सर्वेक्षणाचा हा दुसरा टप्पा असून यात गोंदिया शहराचीही निवड करण्यात आली आहे. त्यानुसार येत्या १७ ते १९ जानेवारी या काळात हे स्वच्छता सर्वेक्षण केले जाणार आहे. या सर्वेक्षणासाठी गुणवत्ता नियंत्रण विभागाने विशेष पथक शहरात येणार असून ते शहरात स्वच्छता विषयक काय सुविधा उपलब्ध आहेत हे जाणून घेतील. तसेच शहरवासीयांशी संवाद साधून त्यांना आणखी काय अपेक्षीत याबाबतही जाणून घेतले जाणार आहे.