भाजप जिल्हाध्यक्षपदी पटले

भारतीय जनता पक्षाच्या जिल्हाध्यक्षपदी माजी आमदार हेमंत पटले यांची निवड करण्यात आली आहे.

माजी जिल्हाध्यक्षच बनले सूचक : सर्वानुमते घेण्यात आला निर्णय गोंदिया : भारतीय जनता पक्षाच्या जिल्हाध्यक्षपदी माजी आमदार हेमंत पटले यांची निवड करण्यात आली आहे. रविवारी (दि.१७) येथील शासकीय विश्रामगृहात पक्षातील वरिष्ठ नेते व पदाधिकाऱ्यांच्या उपस्थितीत सर्वानुमते हा निर्णय घेण्यात आला. भारतीय जनता पक्षाचे जिल्हाध्यक्ष विनोद अग्रवाल यांचा तीन वर्षांचा कार्यकाळ पूर्ण झाल्याने नवीन जिल्हाध्यक्षांची निवड करावयाची होती. जिल्हाध्यक्षपदासाठी यावेळी माजी आमदार हेमंत पटले, माजी नगराध्यक्ष अशोक इंगळे, माजी आमदार केशव मानकर, निष्ठावान येसुलाल उपराडे, माजी आमदार डॉ. खुशाल बोपचे यांची नावे चर्चेत होती. दरम्यान रविवारी (दि.१७) येथील शासकीय विश्रामगृहात जिल्हाध्यक्ष निवडीला घेऊन पदाधिकाऱ्यांची बैठक घेण्यात आली. पक्ष पर्यवेक्षक अशोक धोटे, विदर्भ संघटन मंत्री डॉ. उपेंद्र कोठेकर, पालकमंत्री राजकुमार बडोले, जिल्हाध्यक्ष विनोद अग्रवाल यांच्यासह आजी-माजी आमदार व पदाधिकाऱ्याच्या उपस्थितीत ही बैठक घेण्यात आली. बैठकीत अग्रवाल यांनी जिल्हाध्यक्षपदासाठी हेमंत पटले यांचे नाव सूचविले तर त्यांच्या नावावर सर्व नेत्यांनी एकमताने हिरवी झेंडी दाखविली. विशेष म्हणजे पटले यांची दुसऱ्यांदा जिल्हाध्यक्षपदावर निवड करण्यात आली आहे. (शहर प्रतिनिधी)