साडेचार एकर जमिनीत काकडीचे पीक
दिलीप चव्हाण - गोरेगाव
तालुक्यातील बबई येथील स्थापत्य अभियंता रवी झामसिंग बघेले यांनी आपल्या चार एकरच्या शेतीमध्ये परंपरागत धान शेतीला बगल देत काकडीची शेती लावली. या शेतीच्या उत्पन्नातून त्यांना लाखो रुपयांचा फायदा झाल्याचे त्यांनी सदर प्रतिनिधीजवळ सांगितले. बघेले यांची ३० एकर जमीन आहे. निव्वळ धान शेती करून काहीएक फायदा होत नाही, हे त्यांच्या लक्षात आल्यावर त्यांनी आपल्या चार एकर जमिनीवर काकडी, कारले, कोहळा, लवकीची झाडे लावली आणि लाखोचे उत्पन्न काढले. २० मार्च २०१४ रोजी बघेले यांनी काकडीचे रोपन केले. आजघडीला त्यांनी १५ टन माल बाजारात विकला लग्नसराईच्या या दिवसात बाजारात काकडीची मोठी मागणी आहे. त्यामुळे त्यांना त्याचा चांगला मोबदलाही मिळाला. दरदिवसी बघेले पाच क्विंटल काकडी बाजारात विकायला नेतात. ८० दिवसात काकडीचे झाड शेवटच्या टप्यात येते. काकडीचे झाड लावण्याच्या ४० दिवसानंतर पीक येते. पुढे गोंदियाच्या बाजारात होलसेलच्या भावात काकडीची विक्री केली जाते. बघेले यांनी काकडीचे उत्पन्न अधिक व्हावे म्हणून शेणखताचा वापर केला. सोबतच काकडीच्या पिकाभोवती मक्याचे झाड लावले. मक्याचे झाड लावल्यामुळे मक्यावर बसणारे किडे, काकडीच्या झाडावर बसणार्‍या किड्यांना भक्ष्य करतात. त्यामुळे काकडीला आलेल्या फुलांची नासाडी होत नाही. फुले झळत नाही, असे त्यांनी सदर प्रतिनिधीजवळ सांगितले. विशेष म्हणजे रवी बघेले सर्वशिक्षा अभियानात कंत्राटी स्थापत्य अभियंता होते. १० वर्षे त्यांनी सेवा दिली. पुढे सेवा समाप्तीचे निकष पुढे करून शासनाने त्यांना पदमुक्त केले. पदमुक्त झाल्यावर त्यांनी निराश न होता शेती करण्याचे धाडस केले. ३० एकर जमिनीपैकी फक्त चार एकड जमिनीवर त्यांनी काकडी लावली आणि शेतीच सर्वोत्तम आहे, हे दाखवून दिले. यासाठी त्यांनी केलेल्या अफाट मेहनतीचे फळ त्यांना मिळाले.