देवरी : येथील जगनाडे चौकातील अशोक अजमेरा (जैन) यांच्या घराची खिडकी तोडून अज्ञात चोरट्यांनी ५५ हजार रुपये नगद व ५० हजार रुपयाचे चांदीचे भांडे चोरी केल्याची घटना बुधवारी रात्री २.३०च्या सुमारास घडली.
प्राप्त माहितीनुसार अजय ट्रेडिंग कंपनीचे मालक अशोक अजमेरा (जैन) व त्यांचे दोन भाऊ असा सात लोकांचा परिवार अनुप कृती या स्वत:च्या निवासात आपआपल्या खोलीत होते. अज्ञात चोरट्यांनी त्यांच्या घराच्या खिडकीचे ग्रील काढून घरात प्रवेश केला. तिन्ही भाऊ आपआपल्या खोलीत होते. चोरट्यांनी दोन भावांच्या खोलीला बाहेरून बंद करून हॉलमध्ये ठेवलेल्या बॅगमध्ये दुकानाची ५५ हजार रुपयाची रोकड व देवघरातील ५५ हजार रुपये किमतीचे चांदीचे भांडे चोरी करून तेथून पळ काढला. जैन यांच्या निवासस्थानापासून पाचशे मीटर अंतरावर असलेल्या हायवे नं. ६ जवळील एका दुकानाच्या सीसीटीव्ही कॅमेऱ्यांमध्ये दोन दुचाकीवर ६ चोरटे जात असल्याचे २.४० मिनिटांनी आढळले. यावरून या चोरीच्या प्रकरणात ६ संशयित चोर असल्याचे बोलले जात आहे. सकाळी ४ वाजता जेव्हा अशोक अजमेरा बाथरूमकरिता उठले तेव्हा त्यांचा दरवाजा बाहेरून लावला असल्याचे आढळले. तेव्हा त्यांनी आपल्या भावास फोन केला. दुसऱ्या भावाच्या रूमचा दरवाजा बाहेरून न लागल्याने ते बाहेर आले व त्यांनी अशोक यांच्या खोलीचा दरवाजा उघडला. तेव्हा त्यांना हॉलमधील अस्ताव्यस्त असलेले सामान दिसले. तेव्हा त्यांना कळले की घरात चोरी झालेली आहे. घरात चौकशी केली असता बॅगमधील ५५ हजार रुपये व देवघरातील चांदीचे भांडे ज्यांचे मूल्य ५० हजार रुपये आहे ते लंपास झाल्याचे आढळले. रात्रीच अशोक जैन यांनी पोलिसांना कळविले. देवरीचे ठाणेदार सिंगनजुडे यांनी घटनास्थळाची पाहणी केली. गुरुवारी सकाळी सीसीटीव्ही फुटेज तपासले तेव्हा २.४० मिनिटांनी दोन मोटारसायकलवर ६ अज्ञात इमस चेहऱ्यावर कापड व हेल्मेट घालून जाताना दिसले. देवरी पोलीस ठाण्यात गुन्हा दखल केला असून तपास ठाणेदार सिंगनजुडे करीत आहेत.