दहा पोलीस निरीक्षकांच्या बदल्या

पणजी : दहा पोलीस निरीक्षकांच्या बदल्यांचा आदेश मंगळवारी पोलीस मुख्यालयातून काढण्यात आला. सिरियल किलर महानंद नाईक प्रकरणानंतर गेली अनेक वर्षे फोंडा पोलीस स्थानकात असलेले निरीक्षक सी. एल. पाटील यांना मडगावला पाठविण्यात आले आहे, तर पणजीहून निरीक्षक राजेंद्र प्रभुदेसाई यांची बदली दोनापावल येथे सीआयडी गुन्हा शाखेत करण्यात आली आहे.सिद्धांत शिरोडकर यांना सीआयडी गुन्हा शाखेतून पणजी स्थानकात आणण्यात आले आहे. दक्षता खात्यातून ब्राझ मिनेझिस यांना कोलवा स्थानकात पाठविले आहे. जिवबा दळवी यांना कुळे येथून आगशी पोलीस स्थानकात, प्रवीण पवार यांना आगशी पोलीस स्थानकातून एसपीसीआरमध्ये पाठविण्यात आले आहे. दक्षता खात्याच्या लाचलुचपत विभागातून निरीक्षक गुरुदास कदम यांना फोंडा वाहतूक विभागात, मडगाव स्थानकातून सुदेश नाईक यांना फोंडा स्थानकात पाठविले आहे. फोंडा वाहतूक विभागातून नीलेश धायगोडकर यांना कुळे स्थानकात, तर उत्तम राऊत देसाई यांना कोलवा येथून मडगाव स्पेशल ब्रँचमध्ये पाठविले आहे.तीन वर्षांपेक्षा अधिक काळ एकाच जागी असलेल्या अधिकाऱ्यांच्या बदल्या करताना जबाबदारीचे भान आणि कार्यतत्परता असलेल्या अधिकाऱ्यांनाच महत्त्वाच्या स्थानकांवर पाठविले जाईल, याची खबरदारी घेण्यात येत आहे, असे पोलीस उपमहानिरीक्षक सुनील गर्ग यांनी पत्रकारांना सांगितले. (प्रतिनिधी)