ऑनलाइ लोकमतपणजी, दि. ६ : गोव्यात किनाऱ्यांच्या सफाईचे काम करणाऱ्या दोन्ही कंत्राटदारांना यापुढे पैसे फेडू नयेत, असा आदेश लोकायुक्त पी. के. मिश्रा यांनी दिला आहे. कंत्राटात भ्रष्टाचार झाल्याची तक्रार समाज कार्यकर्ते आयरिश रॉड्रिग्स, पर्वरीचे आमदार रोहन खंवटे व सुरज बोरकर यांनी लोकायुक्तांकडे केली होती. १९ जुलै रोजी पुढील सुनावणी होणार आहे. राम इंजिनीयरिंग अॅण्ड कन्स्ट्रक्शन कंपनी व भूमिका क्लीन टेक प्रा. लि. कंपनी या दोन कंपन्यांकडे किनारा सफाईचे कंत्राट होते. यात कोट्यवधी रुपयांचा भ्रष्टाचार झालेला असल्याचा आरोप आहे. या प्रकरणात पर्यटन खात्याच्या संचालकांनी त्यांचे म्हणणे मांडावे तसेच कंत्राटविषयक संबंधित फाइल सादर करावी, असे बजावले आहे. गेल्या वर्षी १८ मे रोजी आयरिश यांनी यासंबंधी दक्षता खात्याकडे केलेल्या तक्रारीस अनुसरुन कोणती चौकशी करण्यात आली यासंबंधीचा अहवाल सादर करण्यास दक्षता अधिकाऱ्यांना सांगितले आहे. किनारा सफाईच्या कंत्राटात भ्रष्टाचार झाल्याचा आरोप करताना आयरिश यांनी पर्यटनमंत्री दिलीप परुळेकर, राम इंजिनीयरिंग आणि भूमिका क्लीन टेक या दोन्ही कंपन्यांचे मालक मनिष मोहता, पर्यटन खात्याचे अधिकारी तसेच माजी मुख्यमंत्री तथा विद्यमान संरक्षणमंत्री मनोहर पर्रीकर यांचे बंधू अवधूत यांच्याविरुध्द भादंसंच्या कलम ४२0, १२0 (ब), १९८८च्या भ्रष्टाचार प्रतिबंधक कायद्याच्या कलम ७, ८, ९, १३ (१) (ड) १३ (२) सह गुन्हे नोंदविण्याची मागणी केली होती. सप्टेंबर २0१४ साली हे कंत्राट देण्यात आले. उत्तर गोव्यातील किनाऱ्यांच्या साफसफाईचे वार्षिक ७ कोटी ५१ लाख ४0 हजार ९९९ रुपये कामाचे कंत्राट भूमिका क्लीन टेक कंपनीला तर दक्षिण गोव्यातील किनाऱ्यांच्या साफसफाईचे काम राम इंजिनियरिंग या कंपनीला ७ कोटी ४ लाख ८७ हजार ९९९ रुपयांना दिले होते. दोन्ही कंपन्यांचे मालक मनिष मोहता हेच आहेत, असाही आयरिश यांचा दावा आहे.
एरव्ही २ कोटी रुपयांमध्ये होणाऱ्या कामासाठी १४ कोटी ५६ लाख रुपयांचे कंत्राट देण्यात आले. शास्रीय पध्दतीने किनाऱ्यांची सफाई केली जाईल, असे सांगण्यात आले होते परंतु प्रत्यक्षात या दोन्ही कंपन्यांना त्याबाबत अनुभव नाही, असे आयरिश यांचे म्हणणे आहे. किनाऱ्यांवर कचऱ्याचे ढीग साचून राहिले. कोणतीही साफसफाई झाली नाही. किनाऱ्यांवर कचरा जाळण्यात येऊ लागला तसेच काही ठिकाणी वाळूत तो पुरला जाऊ लागला. उघड्यावर कचरा फेकण्याचे प्रकारही सर्रास घडू लागले. हे सिध्द करण्यासाठी आयरिश यांनी जवळपास १५0 फोटोही आयुक्तांना सादर केले होते.
वरील कंपन्यांना ही कंत्राटे मिळवून देण्यात पर्रीकर यांचे बंधू अवधूत यांची महत्त्वाची भूमिका आहे त्यामुळे त्यांचीही चौकशी व्हायला हवी. या कोट्यवधी रुपये घोटाळा प्रकरणी कसून चौकशी करुन जे अधिकारी दोषी आहेत त्यांच्याकडून पैसे वसूल केले जावेत. कंपन्यांची कंत्राटे रद्द करुन सुरक्षा ठेव जप्त करावी, अशी आयरिश यांची मागणी आहे. ......आमदार रोहन खंवटेकृत समाधान आमदार रोहन खंवटे यांनी लोकायुक्तांच्या आदेशावर समाधान व्यक्त केले. ते म्हणाले की, विधानसभेत या प्रश्नावर आवाज उठविला, तक्रारी केल्या तरी सरकार झोपले होते. लोकायुक्त आता काही ना काही भूमिका घेत असल्याने समाधानच आहे. १९ जुलैपर्यंत प्रत्यक्ष कारवाईची अपेक्षा करतो. या प्रकरणी आयोगाला काही दस्तऐवज हवे असतील ते सादर करण्याची माझी तयारी आहे. कोट्यवधी रुपयांच्या या घोटाळ्याची तड लागली पाहिजे कारण हा जनतेचा पैसा आहे.