गोंझाक रिबेलो मडगावचे नगराध्यक्ष

मडगाव : मडगावच्या नगराध्यक्षपदी अपेक्षेप्रमाणे सत्ताधारी गटाचे गोंझाक रिबेलो निवडून आले. विरोधी गटाचे सदानंद नाईक यांच्यावर त्यांनी १२ विरुद्ध ८ मतांनी विजय मिळविला. नगराध्यक्षपदाचा ताबा घेतल्यानंतर मडगावातील कचरा समस्येवर प्रभावी तोडगा काढण्याबरोबरच मडगाव पालिकेची थकलेली कोट्यवधींची थकबाकी वसूल करण्यावर भर देणार असल्याचे त्यांनी सांगितले. बिनविरोध निवडणूक होईल, असे संकेत मिळत होते. तर क्रॉस वोटिंग होऊन नाईक जिंकतील, अशी आशा विरोधकांना होती. प्रत्यक्षात झालेले क्रॉस वोटिंग रिबेलो यांच्या बाजूने झाले. सत्ताधारी गटाच्या नगरसेविकांची संख्या ११ होती. तरीही त्यांना एक मत जास्त प्राप्त झाले. साहाय्यक पंचायत संचालक राँकन परेरा हे या वेळी निवडणूक अधिकारी म्हणून उपस्थित होते. सकाळी ११ वाजता मतदान प्रक्रियेला सुरुवात झाली. या वेळी २० ही नगरसेवक उपस्थित होते. पहिल्या बारा मतांची रिबेलो व नाईक यांच्यात सहा-सहा अशी विभागणी झाली. मात्र, नंतर रिबेलो यांच्या बाजूने मतांची संख्या वाढली. रिबेलो यांना अकरावे मत पडल्यावर सत्ताधारी गटाने एकच जल्लोष केला. त्यानंतर प्रभारी नगराध्यक्ष धनंजय मयेकर यांनी रिबेलो यांना नगराध्यक्षपदाचा ताबा दिला. रिबेलो यांनी आपण महसुलाची थकबाकी वसूल करण्यावर भर देऊ असे स्पष्ट करताना घरोघर जाऊन कचरा उचलण्याची मोहीम लवकरात लवकर सुरू करण्याचे आश्वासन दिले. मडगावकरांची कामे झटपट व्हावीत, यासाठी आपण कर्मचार्‍यांची बैठक घेऊन लोकांना ताटकळत ठेवू नका, अशा सूचना करणार असल्याचे सांगितले. या नगरमंडळाला भाजप सरकारचा पाठिंबा असल्याने विकासकामांसाठीही भरीव निधी मिळण्याची अपेक्षा त्यांनी व्यक्त केली. (प्रतिनिधी)