महिला उमेदवार सर्र्वाधिक श्रीमंत

सद्गुरू पाटील ल्ल पणजी पणजी महापालिकेच्या निवडणूक रिंगणातील काही महिला उमेदवार सर्वात श्रीमंत आहेत. अर्थात ही श्रीमंती त्यांच्या आणि त्यांच्या पतीच्या ज्ञात व्यवसायांमधून प्राप्त झाली आहे. काही महिला उमेदवारच उच्चशिक्षित असल्याचेही निवडणूक आयोगाकडील प्रतिज्ञापत्रांवरून स्पष्ट होते. महापालिका निवडणुकीच्या रिंगणात ३० प्रभागांमधून शंभरच्या आसपास उमेदवार आहेत. काही पुरुष उमेदवार सातवी व आठवी शिक्षित आहेत. ९० टक्के पुरुष उमेदवार दहावी-बारावी शिक्षित आहेत. केवळ चार टक्के उमेदवार पदवीधर आहेत. तिघा पुरुष उमेदवारांची पार्श्वभूमी ही गुन्हेगारीची आहे. त्यांच्यावर पोलीस ठाण्यांत गुन्हे व न्यायालयांत खटले आहेत. सर्व उमेदवारांनी सांपत्तिक स्थिती, शैक्षणिक पार्श्वभूमी, व्यवसायाबाबतची माहिती प्रतिज्ञापत्रामधून दिली आहे. प्रत्येक उमेदवाराचे वार्षिक सरासरी उत्पन्न तीन ते चार लाख रुपये कागदावर दाखविले तरी आहे. काही उमेदवारांचे सरासरी अडीच लाख उत्पन्न दाखविले आहे. प्रभाग क्रमांक पाचमधून लढणाऱ्या नगरसेविका शीतल दत्तप्रसाद नाईक यांनी त्यांचे वार्षिक उत्पन्न २१ लाख ३७ हजार ५८५ रुपये दाखविले आहे. शीतल नाईकच सर्व उमेदवारांमध्ये सर्र्वाधिक उत्पन्न दाखविलेल्या उमेदवार आहेत. त्यांचे पती दत्तप्रसाद नाईक यांचेही वार्षिक उत्पन्न २१ लाख ३७ हजार ५८५ रुपये दाखविले आहे. शीतल नाईक यांनी शिरोडा येथील कामाक्षी कॉलेजमधून बॅचलर आॅफ होमिओपॅथी, मेडिसीन अ‍ॅण्ड सायन्स ही पदवी प्राप्त केली आहे. प्रभाग क्रमांक नऊमधून लढणाऱ्या श्रीमती रुथ फुर्तादो यांचा क्रमांक शीतलनंतर लागतो. त्यांनी वार्षिक उत्पन्न ११ लाख ४१ हजार रुपये दाखविले आहे. त्यांचे पती माजी महापौर सुरेंद्र फुर्तादो यांनी त्यांचे उत्पन्न ९ लाख ६८ हजार ७१३ रुपये दाखविले आहे. रुथ या एलएलबी शिक्षित आहेत. गौरीश धोंड यांनी त्यांचे व पत्नीचे वार्षिक उत्पन्न प्रत्येकी केवळ २ लाख ८४ हजार रुपये दाखविले आहे. गौरीश पदवीधर आहेत. सोरया मखिजा पिंटो या महिला उमेदवार बीए शिक्षित आहेत. त्यांच्याकडे पत्रकारितेतील मास्टर्स डिप्लोमा आहे. प्रभाग क्रमांक बारामधून लढणाऱ्या माजी महापौर वैदही नाईक या बीकॉम शिक्षित आहेत. त्यांनी त्यांचे वार्षिक उत्पन्न चार लाख रुपये दाखवले आहे. लता यतीन पारेख (प्रभाग चौदा) यांचे वार्षिक उत्पन्न ८ लाख ७९ हजार आहे. (संपत्तीचा तपशील पान ४)