अरविंद केजरीवाल मंगळवारी गोवा भेटीवर

पणजी : आम आदमी पक्षाचे दिल्लीतील मुख्यमंत्री अरविंद केजरीवाल हे मंगळवार, दि. २८ रोजी तीन दिवसांच्या गोवा भेटीवर येत आहेत. २८ रोजी दाखल होताच दाबोळी विमानतळावरून केजरीवाल हे खारीवाडा-वास्को येथे जातील. तिथे ते मच्छीमारांशी संवाद साधतील. त्यांचे प्रश्न समजून घेतील. दुसऱ्या दिवशी गोव्यातील छोट्या हॉटेल व्यावसायिकांच्या बैठकीत कळंगुट येथे केजरीवाल सहभागी होतील. हॉटेल व्यावसायिकांच्या समस्या ते जाणून घेतील. केजरीवाल हे फोंडा येथे युवकांच्या मेळाव्यासही मार्गदर्शन करून त्यांच्याशी संवाद साधतील. ही माहिती आपचे नेते रूपेश शिंक्रे, राजश्री नगर्सेकर व डॉ. हेमाली देसाई यांनी शनिवारी येथे पत्रकार परिषदेत दिली. केजरीवाल यांची कांपाल-पणजी येथील सभा यशस्वी ठरल्यानंतर केजरीवाल हे दर ४५ दिवसांनी गोव्यात येतील, असे आपने जाहीर केले होते. त्यानुसार केजरीवाल यांची गोवा भेट निश्चित झाली आहे. (खास प्रतिनिधी)