सिंचन विहिरीची कामे मंदावली

महात्मा गांधी राष्ट्रीय रोजगार हमी योजनेंतर्गत मंजूर करण्यात आलेल्या सिंचन विहीर व इनवेल बोरिंगची कामे

गडचिरोली : महात्मा गांधी राष्ट्रीय रोजगार हमी योजनेंतर्गत मंजूर करण्यात आलेल्या सिंचन विहीर व इनवेल बोरिंगची कामे पंचायत समिती व ग्रामपंचायत प्रशासनाच्या उदासीनतेमुळे मंदाविली आहेत. सिंचन विहिरींचे काम तातडीने करून घेण्यासाठी शेकडो लाभार्थी पंचायत समिती कार्यालयात वारंवार चकरा मारत असल्याचे दिसून येत आहे. जिल्हा परिषद प्रशासनाने ३१ मे २०१५ पूर्वी नरेगा अंतर्गत सिंचन विहीर व इनवेल बोरिंगची कामे पूर्ण करण्याचे निर्देश सर्व १२ पंचायत समित्यांना दिलेले आहेत. सदर कामे पावसाळ्यापूर्वी करण्यासाठी जि.प. प्रशासनाने सिंचन विहीर व इनवेल बोरिंगच्या कामासाठी अ‍ॅडव्हॉन्स म्हणून अग्रीम रक्कमही मंजूर केली आहे. मात्र पंचायत समिती, ग्रामपंचायत व कंत्राटदारांमध्ये समन्वय नसल्याने सिंचन विहिरींच्या कामात गती नसल्याचे दिसून येत आहे. सन २००८-०९ पासून तर २०१४-१५ पर्यंत नरेगा अंतर्गत जिल्ह्यात एकूण ३ हजार ९० सिंचन विहिरींच्या कामांना प्रशासकीय मान्यता प्रदान करण्यात आली. यापैकी ९५१ सिंचन विहिरींची कामे पूर्ण झाले आहे तर १२८० कामे सुरू आहेत. जवळपास ७०० विहिरी अपूर्णावस्थेत आहे. दगड लागल्यामुळे जिल्ह्यातील २६ सिंचन विहिरींचे काम बंद पडले आहे. (स्थानिक प्रतिनिधी)सिंचन सुविधेवर परिणाम होणारनरेगा अंतर्गत जिल्ह्यातील सिंचन विहिरींचे काम पावसाळ्यापूर्वी पूर्ण होणे आवश्यक आहे. मात्र प्रशासकीय दिरंगाईमुळे जिल्ह्यातील जवळपास ५०० सिंचन विहिरींचे काम अपूर्ण राहणार आहे. तर २०० हून अधिक सिंचन विहिरींचे इनवेल बोरिंगचे काम शिल्लक राहणार आहे. यामुळे यंदाच्या खरीप हंगामात सिंचन सुविधेवर परिणाम होणार असून लाभार्थी शेतकरी सिंचन सुविधेपासून वंचित राहणार असल्याची शक्यता आहे.२०० हून अधिक विहिरी इनवेल बोरिंगच्या प्रतीक्षेतनरेगा अंतर्गत २०१४-१५ या वर्षापासून २ लाख ९० हजार रूपयांच्या अनुदानातून सर्व प्रवर्गाच्या शेतकरी लाभार्थ्यांना सिंचन विहिरींचा लाभ दिल्या जातो. यामध्ये सिंचन विहिरीच्या खोलीच्या खाली साधारणत: १०० फूट अंतरापर्यंत इनवेल बोअर मारल्या जाते. मात्र पंचायत समिती व ग्रा.पं. प्रशासनाच्या उदासीनतेमुळे पूर्ण झालेल्या जवळपास २०० सिंचन विहिरी इनवेल बोरिंगच्या प्रतीक्षेत असल्याची माहिती आहे.कंत्राटदार म्हणतो, आधी अ‍ॅडव्हान्स द्यानरेगा अंतर्गत पूर्ण झालेल्या सिंचन विहिरीला इनवेल बोअर मारण्यासाठी जि.प. प्रशासनाने अग्रीम रक्कम मंजूर केली आहे. सदर रक्कम संबंधित ग्रामपंचायतीच्या खात्यात वळते करण्यात आले आहे. यातून ग्रा.पं. प्रशासन, ग्रामसेवक व लाभार्थ्यांनी खासगी कंत्राटदाराकडून इनवेल बोअरचे कामे पूर्ण करून घ्यावीत, असे जि.प. प्रशासनाचे निर्देश आहे. मात्र सदर काम करून घेण्यासाठी कंत्राटदार आधी अ‍ॅडव्हॉन्स द्या, त्यानंतर काम करतो, असे म्हणत आहे. त्यामुळे इनवेल बोअरची कामे थंडबस्त्यात आहे.