महिलांनी फोडले ग्रा.पं. समोर पाण्याचे माठ

कुरखेडा मुख्यालयात गेल्या महिन्याभरापासून होत असलेल्या अपुर्‍या पाणी पुरवठय़ाच्या विरोधात मंगळवारी महिलांनी आयोजित महिला ग्रामसभेमध्ये ग्रामपंचायत प्रशासनाच्या

कुरखेडा : कुरखेडा मुख्यालयात गेल्या महिन्याभरापासून होत असलेल्या अपुर्‍या पाणी पुरवठय़ाच्या विरोधात मंगळवारी महिलांनी आयोजित महिला ग्रामसभेमध्ये ग्रामपंचायत प्रशासनाच्या विरोधात घोषणाबाजी करीत ग्रामपंचायत कार्यालयाच्या प्रवेशद्वारावर माठ फोडून आपला राग व्यक्त केला.

यावेळी वार्डातील नंदा खोबरे, ताना नरोटे, मंदा मानकर, शालू रोकडे, वर्ष मानकर, जिजा खोबरे, शारदा हलामी, यशोदा हलामी, पठाण बी, शैजा उसेंडी, जिजा तुलावी, रुपाली बनपुरकर , सुमन हरामी, कुंता तुलावी, धनराज लाकडे आदी उपस्थित होते. कुरखेडा गावात सती नदीवरून संपूर्ण गावाला ग्रामपंचायतीच्या पाणी पुरवठा योजनेमार्फत पाण्याचा पुरवठा केला जातो. शहरातील सर्व भागात योग्य प्रकारे पाणी पुरवठा केला जात नाही. त्यातच अनेक ठिकाणी ग्रामपंचायतमार्फत पाणी पुरवठा सुरू होताच नागरिक टिल्लूपंप लावून पाणी ओढून घेतात. त्यामुळे अन्य नागरिकांना नळाद्वारे पाणीच मिळत नाही. उन्हाळ्याच्या दिवसा पाण्याचा पुरवठा कमी त्यातही टिल्लूपंपाने पाणी ओढून घेण्याचे प्रकार सुरू असल्याने शहरातील अनेक भागात पाण्याचा पुरवठा होत नाही. ग्रामपंचायतीमार्फत टिल्लूपंप लावणार्‍यांवर कोणतीही कारवाई करण्यात येत नाही, असा नागरिकांचा आरोप आहे. त्यामुळे संतप्त झालेल्या शेकडो महिलांनी आज ग्रामपंचायतीच्या विशेष ग्रामसभेवर धडक देऊन आपला संताप व्यक्त केला. याबाबत सामाजिक कार्यकर्ते धनराज लाकडे यांनी यापूर्वीच ग्रामपंचायत प्रशासनाला या प्रश्नावर लेखी निवेदनही दिले आहे. कुरखेडा येथील नवीन पाणी पुरवठा योजनेचा बांधकामाकरीता १ कोटी पेक्षा अधिक खर्च होऊनही संबंधित अधिकारी व कंत्राटदाराचा नियोजन शुन्यतेमुळे योजना निकामी ठरलेली आहे. परिसरातील अनेक पाणी पुरवठा योजना विभागाच्या उदासिनतेने रखडत आहे. (शहर प्रतिनिधी)