तीन आदिवासी प्रकल्प : शाळा निवडण्याची प्रक्रिया सुरूगडचिरोली : नामांकित शाळेत प्रवेशासाठी जिल्ह्यातील तीन एकात्मिक आदिवासी विकास प्रकल्प कार्यालयांना प्रत्येकी एक हजार या हिशोबाने तीन हजार विद्यार्थी गोळा करण्याचे उद्दीष्ट देण्यात आले होते. १० जुलैपर्यंत या तिन्ही प्रकल्पांनी १ हजार ९७५ विद्यार्थ्यांची अंतिम यादी तयार केली असून त्यांना इंग्रजी माध्यमाच्या नामांकित शाळेत प्रवेश देण्याची तयारी सुरू केली आहे. आदिवासी विकास विभागाने आदिवासी समाजाच्या विद्यार्थ्यांची शिक्षणाची सोय व्हावी यासाठी आश्रमशाळा स्थापन केल्या आहेत. या आश्रमशाळांमध्ये पहिली ते बारावीपर्यंतचे शिक्षण दिले जाते. त्याचबरोबर त्यांच्या राहण्याची सोयही संबंधित आश्रमशाळांमध्ये करण्यात येते. मात्र आश्रमशाळांचा दर्जा सुमार झाला आहे. परिणामी बरेचसे पालकवर्ग आश्रमशाळांमध्ये आपल्या पाल्याला पाठविण्यासाठी तयार होत नाही. त्याचबरोबर इंग्रजी माध्यमाचे महत्त्वही वाढत चालले आहे. आदिवासी विद्यार्थ्यांना इंग्रजी माध्यमाचे शिक्षण मिळावे यासाठी मुख्यमंत्री देवेंद्र फडणवीस यांनी प्रत्येक प्रकल्पातून एक हजार विद्यार्थ्यांना इंग्रजी माध्यमाच्या नामांकित शाळेत टाकले जाईल, असा निर्णय घेतला. संबंधित विद्यार्थ्यांच्या शिक्षणापासून ते राहण्याचा खर्च आदिवासी विकास विभागाच्या मार्फतीने उचलला जाणार आहे. प्रत्येक प्रकल्प कार्यालयाला एक हजार विद्यार्थी गोळा करण्याचे उद्दीष्ट देण्यात आले होते. या योजनेनुसार पहिली व पाचवीच्या विद्यार्थ्यांना प्रवेश दिला जाणार होता. गडचिरोली जिल्ह्यात एकूण तीन प्रकल्प कार्यालये आहेत. शासनाचा आदेश धडकताच तिन्ही प्रकल्प कार्यालये विद्यार्थी शोधण्याच्या कामास लागले. हे काम आश्रमशाळेच्या शिक्षकांवरही सोपविण्यात आले. प्रकल्प कार्यालयाकडे आलेल्या अर्जातून छाननी केल्यानंतर तिन्ही प्रकल्प कार्यालयांनी अंतिम यादी तयार केली आहे. गडचिरोली प्रकल्पाने ८०० विद्यार्थ्यांची अंतिम यादी सद्य:स्थितीत बनविली आहे. तर भामरागड प्रकल्पातील ७१५ व अहेरी प्रकल्पातील ४६० विद्यार्थ्यांची यादी बनली आहे. अशा एकूण तिन्ही प्रकल्पातील मिळून १ हजार ९७५ विद्यार्थ्यांना आदिवासी विकास विभागाने ठरवून दिलेल्या नामांकित शाळेत प्रवेश दिला जाणार आहे. (नगर प्रतिनिधी)
दोन हजार विद्यार्थ्यांना नामांकित शाळेत प्रवेश
By admin | Updated: July 11, 2015 02:16 IST