सहलीतून विद्यार्थ्यांच्या ज्ञानकक्षा रूंदावल्या

महाराष्ट्र पोलिसांच्या ‘आपला महाराष्ट्र’ या सुवर्ण जयंती सहल योजनेच्या माध्यमातून गडचिरोली जिल्ह्यातील नक्षलग्रस्त अतिदुर्गम भागातील ...

पोलीस विभागाचा उपक्रम : विविध स्थळांना भेटी देऊन घेतली माहितीगडचिरोली : महाराष्ट्र पोलिसांच्या ‘आपला महाराष्ट्र’ या सुवर्ण जयंती सहल योजनेच्या माध्यमातून गडचिरोली जिल्ह्यातील नक्षलग्रस्त अतिदुर्गम भागातील आदिवासी विद्यार्थ्यांना महाराष्ट्र दर्शन घडले. या सहलीदरम्यान विद्यार्थ्यांनी मुंबई, पुणे, औरंगाबाद, नागपूर आदींसह इतर महत्त्वाच्या शहरांना भेटी देऊन तेथील महत्त्वाच्या वास्तू पाहिल्या. यातून नक्षलग्रस्त भागातील आदिवासी विद्यार्थ्यांच्या ज्ञानाच्या कक्षा रूंदावल्या असल्याचे दिसून येते.आपला महाराष्ट्र सहलीच्या शेवटच्या टप्प्यात गडचिरोली जिल्ह्यातील नक्षलग्रस्त भागातील आदिवासी विद्यार्थ्यांनी नागपूर शहरातील विविध स्थळांना भेटी देऊन शैक्षणिक, औद्योगिक विकासाची माहिती जाणून घेतली. महाराष्ट्र पोलीस विभागातर्फे सुरू असलेल्या या सहलीच्या उपक्रमाचा हा नववा टप्पा होता. नवव्या टप्प्यातील सहलीत जिल्ह्यातील दुर्गम आदिवासी भागातील ४१ मुली व ३६ मुले असे एकूण ७७ विद्यार्थी सहभागी झाले होते. गडचिरोलीचे पोलीस अधीक्षक संदीप पाटील यांच्या मार्गदर्शनात २३ मे २०१५ रोजी सदर सहल गडचिरोली येथून रवाना करण्यात आली होती. नागपूर सहलीदरम्यान विद्यार्थ्यांनी शहरातील दीक्षाभूमी, बुट्टीबोरी येथील आईस्क्रीम फॅक्टरी, अंबाझरी उद्यान व क्रेझी कॅसल वॉटर पार्क आदी स्थळांना भेटी देऊन त्याची माहिती जाणून घेतली. त्यापूर्वी सहलीतील विद्यार्थ्यांनी मुंबई येथील विधानसभवन, मंत्रालय, पोलीस महासंचालक कार्यालय, पोलीस आयुक्त कार्यालय, बांद्रा, जहु चौपाटी, गेट वे आॅफ इंडिया, ताज हॉटेल, एलिफंटा केव्हस, गिरगाव चौपाटी आदी स्थळांना भेटी देऊन माहिती जाणून घेतली. त्यानंतर सहलीत सहभागी झालेल्या विद्यार्थ्यांनी पुणे येथील हिंजवडी, आगाखान पॅलेस, पुणे विद्यापीठ, भांडारकर संस्था, दगडूशेठ हलवाई गणपती मंदिर, शनिवारवाडा, लाल महाल, सिंहगड किल्ला, खडकवासला धरण, कात्रज सर्पोद्यान, सारसबाग आदी ठिकाणी भेटी दिल्या. तसेच औरंगाबाद येथे मुंबई उच्च न्यायालयाचे औरंगाबाद खंडपीठ, डॉ. बाबासाहेब आंबेडकर मराठवाडा विद्यापीठ, अजिंठा वेरूळ लेणी आदी ठिकाणी भेटी देऊन तेथील सौंदर्य न्याहाळले.नागपूर येथील सहलीच्या यशस्वीतेसाठी नक्षल विरोधी अभियानाचे विशेष पोलीस महानिरीक्षक तथा सहपोलीस आयुक्त राजवर्धन तसेच जिल्हा पोलीस अधीक्षक संदीप पाटील यांच्या मार्गदर्शनात अपारंपरिक अभियान प्रशिक्षण केंद्राचे उपप्राचार्य महेश चव्हाण, नक्षल विरोधी अभियानाचे पोलीस निरीक्षक मनोज यादव, गडचिरोलीच्या पोलीस अधीक्षक कार्यालयाचे पोलीस निरीक्षक सुभाष ढवळे, सहाय्यक पोलीस निरीक्षक मनोज बहुरे, अशोक रूपनारायण, पोलीस उपनिरीक्षक संजय खंडारे, यशोदा कणसे यांच्यासह इतर अधिकारी व कर्मचाऱ्यांनी सहकार्य केले. (स्थानिक प्रतिनिधी)