आरओ वेस्टेज वाॅटरपासून वृक्ष संगाेपन

लाहेरी : दरवर्षी उन्हाळ्यात पाणी टंचाईची समस्या भामरागड तालुक्यात निर्माण हाेते. नागरिकांना पिण्याच्या पाण्यासाठी भटकावे लागते. लाहेरीत तीव्र पाणी टंचाई निर्माण हाेत नसली तरी आरओच्या टाकाऊ पाण्याचा सदुपयाेग व्हावा, यासाठी पाेलिसांनी टाकाऊ पाइपचा वापर करून झाडांपर्यंत पाणी पाेहाेचविण्याची व्यवस्था केली. या माध्यमातून वृक्ष संवर्धन व संगाेपन केले जात आहे. भामरागडचे उपविभागीय पाेलीस अधिकारी कुणाल सोनवणे यांच्या मार्गदर्शनाखाली उपपोलीस स्टेशन लाहेरीचे प्रभारी अधिकारी अविनाश नळेगावकर व इतर पोलीस अधिकारी तसेच पोलीस अंमलदारांनी टाकाऊपासून टिकाऊ उपक्रम सुरू करीत निरुपयोगी पाइपचे तुकडे उपपाेलीस ठाण्यातील आरओ प्लाॅंटच्या वेस्टेज वॉटरच्या पाइपला जाेडले. यातून ठिबकसदृश सिंचन प्रणाली विकसित झाली. जाेडलेल्या पाइपद्वारे झाडांना पाणी देण्याची सोय केली. यामुळे पाण्याची बचत तर झालीच शिवाय उन्हाळ्यात झाडांनादेखील वरून पाणी देण्याची गरज भासणार नाही. वाया जाणाऱ्या पाण्याचा सदुपयाेग या माध्यमातून हाेत आहे. लाहेरी पोलिसांनी पर्यावरणाबद्दल असलेले प्रेम व बांधीलकी दाखविल्याने त्यांच्या उपक्रमाचे काैतुक हाेत आहे.