गाेंडवाना पदवीदान समारंभ गडचिराेलीतच घ्या

गोंडवाना विद्यापीठाचे मुख्यालय गडचिरोली येथे असून, संपूर्ण प्रशासकीय कामकाज गडचिरोली येथूनच चालविल्या जाते. विद्यापीठ परिसरात पदवीदान समारंभासाठी पुरेशी जागा व पर्याप्त यंत्रणा गडचिरोली येथे उपलब्ध आहे. या पूर्वीचे सर्व पदवीदान समारंभ गडचिरोली येथे यशस्वीपणे संपन्न झाले आहेत. एवढेच नव्हे तर विद्यापीठाचे राष्ट्रीय स्तरावरील अनेक समारंभ, परिषदासुद्धा येथेच यशस्वीपणे पार पडल्या आहेत. असे असताना यावर्षीचा पदवीदान समारंभ चंद्रपूर येथे घेण्याचे काहीही कारण नाही. गडचिरोली जिल्ह्यातील विविध राजकीय व सामाजिक संघटनांनीसुद्धा पदवीदान समारंभ गडचिरोली येथेच व्हावा, अशी मागणी केलेली आहे. जिल्ह्यातील सामाजिक, सांस्कृतिक व शैक्षणिक वातावरण अधिक बिघडू नये यासाठी गोंडवाना विद्यापीठाचा पदवीदान समारंभ गडचिरोली येथेच घेण्यात यावा, अशी मागणी प्रा. संध्या येलेकर यांनी केली आहे.