दोन गंभीर जखमी : आरमोरी मार्गावरील मोहझरीनजीकची घटनागडचिरोली : ट्रकच्या प्रेशर पाईपची दुरूस्ती सुरू असताना रस्त्यावर उभ्या असलेल्या ट्रकला भरधाव येणाऱ्या ट्रकने जबर धडक दिल्याने दोघेजण गंभीर जखमी झाल्याची घटना गडचिरोली-आरमोरी मार्गावर पोर्ला गावाजवळील मोहझरी जवळ मंगळवारी रात्री १ वाजताच्या सुमारास घडली. दिलीप ताडाम व लक्ष्मण ताडाम हे दोघेजण या अपघातात जखमी झाले. आरमोरीवरून येणाऱ्या सीजी ०९ एल २९१४ या ट्रकचे अचानक प्रेशर पाईप फुटले. दरम्यान सदर ट्रक व मागे असलेल्या सहकाऱ्याचा ट्रक रस्त्याच्या कडेला लावून प्रेशर पाईपची दुरूस्ती सुरू होती. दरम्यान एमएच ४० वाय ३१३३ क्रमांकाचा ट्रेलर कंपनीचा ट्रक मागून रस्त्यावरील ट्रकला जबर धडक दिली. यात दिलीप ताडाम व लक्ष्मण ताडाम यांच्या पायावर चाक गेल्याने त्यांना प्रचंड दुखापत झाली. ट्रक क्षतिग्रस्त झाल्याने रस्त्यावर उभे असलेल्या या दोन्ही ट्रकचे जवळपास १६ लाख रूपयांचे नुकसान झाले. घटनेची माहिती मिळताच गडचिरोली पोलिसांनी घटनास्थळ गाठून दोन्ही जखमी ट्रकचालकांना जिल्हा सामान्य रूग्णालयात दाखल केले. घटनेचा पंचनामा केला. मात्र पोलीस घटनास्थळी पोहोचण्यापूर्वी आरोपी ट्रकचालक फरार झाला. पोलिसांनी एमएच ४० वाय ३१३३ या अज्ञात ट्रक चालकावर भादंविचे कलम २७९, ३३८, ४२७, १८४, १३४ (अ) (ब) अन्वये गुन्हा दाखल केला आहे. या घटनेचा पुढील तपास गडचिरोली पोलीस करीत आहेत. (स्थानिक प्रतिनिधी)
उभ्या ट्रकला ट्रकची मागून धडक
By admin | Updated: July 8, 2015 01:58 IST