एसटी-बोलेरोची समोरासमोर धडक

राज्य परिवहन महामंडळाच्या गडचिरोली आगाराची बस व बोलेरो वाहनाची समोरासमोर धडक झाल्याची घटना

शिवणी बसथांब्यावरील घटना : पाच किरकोळ जखमीगडचिरोली : राज्य परिवहन महामंडळाच्या गडचिरोली आगाराची बस व बोलेरो वाहनाची समोरासमोर धडक झाल्याची घटना गुरूवारी दुपारी १ वाजताच्या सुमारास घडली. या अपघातात चार ते पाच जण किरकोळ जखमी झाल्याची माहिती आहे. राज्य परिवहन महामंडळाची एमएच-०७-सी-७६८७ क्रमांकाची बस गडचिरोलीकडून चामोर्शीकडे प्रवाशी घेऊन जात होती. तर चामोर्शीवरून गडचिरोलीकडे एमएच-३३-ए-२५३८ क्रमांकाचे बोलेरो वाहन येत होते. शिवणी बसथांब्यासमोर एक दुचाकीस्वार आपल्या वाहनात हवा भरत होता. या दुचाकीस्वाराला वाचविण्याच्या प्रयत्नात बस चालकाने बस बाजुने हाकली. दरम्यान चामोर्शीकडून येणाऱ्या बोलेरो व एसटीची समोरासमोर धडक बसली.या घटनेची तक्रार गडचिरोली पोलीस ठाण्यात करण्यात आली नाही, अशी माहिती पोलिसांनी दिली आहे. त्यामुळे या अपघातात किरकोळ जखमी झालेल्या इसमांची नावे कळू शकली नाही. या अपघातात बोलेरो वाहन समोरच्या बाजुने प्रचंड क्षतीग्रस्त झाले. तसेच एसटी महामंडळाचेही नुकसान झाले. (स्थानिक प्रतिनिधी)