पोलीस कर्मचाऱ्यांची अंधश्रद्धा दूर करण्यासाठी प्रबोधन

राज्यात जादूटोणाविरोधी कायदा लागू करण्यात आला. या कायद्याची अंमलबजावणी करण्याचे काम पोलीस यंत्रणेकडे आहे.

गडचिरोलीत कार्यक्रम : श्याम मानव यांनी केले मार्गदर्शनगडचिरोली : राज्यात जादूटोणाविरोधी कायदा लागू करण्यात आला. या कायद्याची अंमलबजावणी करण्याचे काम पोलीस यंत्रणेकडे आहे. मात्र यंत्रणेतही अनेकजण अंधश्रद्धेच्या आहारी असल्याचे दिसून आले आहे. अंधश्रद्धा व जादूटोणाविरोधी कायद्याची अंमलबजावणी करणाऱ्या यंत्रणेला यासंदर्भात योग्य माहिती व्हावी, या उद्देशाने राज्य सरकारने राज्यभर ‘वैज्ञानिक दृष्टिकोन व जादुटोणाविरोधी कायदा’ या विषयावर दक्षता अधिकारी व पोलिसांच्या प्रशिक्षणाचा कार्यक्रम आयोजित केला आहे. याचा एक भाग म्हणून गडचिरोली येथे मंगळवारी जिल्हा पोलीस मुख्यालयात प्रशिक्षणाचे आयोजन करण्यात आले होते. अंधश्रद्धा निर्मुलन समितीचे राष्ट्रीय संघटक प्रा. श्याम मानव यांनी पोलीस अधिकाऱ्यांना या कायद्याबाबतची संपूर्ण माहिती दिली. जादुटोणाविरोधी कायदा राज्यभर निट वापरला जावा, यासाठी पोलीस विभागातील कर्मचाऱ्यांना प्रशिक्षित करण्यात आले. गडचिरोली जिल्ह्यातील विविध पोलीस ठाण्याचे अधिकारी यावेळी मोठ्या संख्येने उपस्थित होते. याप्रसंगी पीआयएमसीचे राज्य समन्वयक प्रवीण गांगुर्डे हे ही उपस्थित होते. त्यांनी कार्यक्रमाचे प्रास्ताविक केले. हा कार्यक्रम सामाजिक न्याय व विशेष सहाय्य विभाग, जादुटोणाविरोधी कायदा जनजागृती प्रचार व प्रसार कार्यक्रम अंमलबजावणी समिती महाराष्ट्र शासन, समाजकल्याण विभाग यांच्या वतीने आयोजित करण्यात आला होता. याप्रसंगी मार्गदर्शन करताना प्रा. श्याम मानव यांनी समाजावर अंधद्धेचा पगडा आहे. पोलीस हे देखील समाजाचाच एक घटक असल्यामुळे त्यांच्यातील अनेकांवर पगडा असल्याचे दिसून येते. त्यांच्या अंधश्रद्धा दूर झाल्या व त्यांना कायद्याची सखोल माहिती मिळाल्यास जादुटोणाविरोधी कायद्याची चांगली अंमलबजावणी होईल, असे प्रतिपादन केले. (जिल्हा प्रतिनिधी)