पक्षशिस्तीला डावलून जिल्हाध्यक्षाची एकतर्फी कारवाई

भाजपाचे चामोर्शी पंचायत समिती उपसभापती केशव भांडेकर यांच्या विरोधात अविश्वास प्रस्ताव आणून त्यांच्या विरोधात मतदान केल्याचा ठपका

वरिष्ठांकडे दाद मागणार : मनमोहन बंडावारसह पाच पं.स. सदस्यांची माहितीगडचिरोली : भाजपाचे चामोर्शी पंचायत समिती उपसभापती केशव भांडेकर यांच्या विरोधात अविश्वास प्रस्ताव आणून त्यांच्या विरोधात मतदान केल्याचा ठपका ठेवून भाजपाचे जिल्हाध्यक्ष किसन नागदेवे यांनी आम्हा पाच पंचायत समिती सदस्यांवर पक्षातून निष्कासित करण्याची कारवाई केली. मात्र सदर कारवाई करताना नागदेवे यांनी चामोर्शीचे भाजपा तालुकाध्यक्ष यांच्याशी कुठलीही चर्चा केली नाही. तसेच जिल्हा कार्यकारिणीचा ठरावही घेतला नाही. भाजपाच्या कोर कमिटीचा निर्णय घेतला नाही. जिल्हाध्यक्ष नागदेवे यांनी पक्षशिस्तीला पायदळी तुडवून आमच्यावर एकतर्फी कारवाई केली, असा आरोप करीत या संदर्भात आपण पक्षाच्या वरिष्ठ नेत्यांकडे दाद मागणार असल्याची माहिती चामोर्शीचे पं.स. सदस्य मनमोहन बंडावार, भाजपाचे पं.स. गटनेते रेवनाथ कुसराम यांनी मंगळवारी आयोजित पत्रकार परिषदेत दिली.यावेळी माहिती देताना मनमोहन बंडावार यांनी सांगितले की, भाजपाच्या क्रियाशील सदस्यास पक्षातून निष्कासीत करण्यासाठी एक विशिष्ट पध्दत आहे. निष्कासीत करणाऱ्यांच्या विरोधात तसा ठराव पक्षाच्या जिल्हा कार्यकारीणीत पारित झाला पाहिजे. सदर ठराव पक्षाच्या कोर कमिटीकडे पाठवावा लागतो. त्यानंतर कोर कमिटीने घेतलेला निर्णय प्रादेशिक स्तरावरील शिस्तपालन समितीकडे पाठवावा लागतो. प्रादेशिक स्तरावरून झालेल्या निर्णयानुसार पक्षातून निष्कासीत करण्याची कारवाई जिल्हाध्यक्षांना करता येते. मात्र भाजपाचे जिल्हाध्यक्ष नागदेवे यांनी अशी कुठलीही प्रक्रिया पार न पाडता स्वत:च्या मनमर्जीने भाजपच्या पाच पं.स. सदस्यांना पक्षातून निष्कासीत करण्याची कारवाई केली. आम्हा पाचही जणाला जिल्हाध्यक्ष नागदेवे यांनी पक्षशिस्तीचा भंग केल्याबाबतची कोणतीही नोटीस व पूर्वसूचना दिली नाही. उलट आमचे पाचही जणांचे पं.स. सदस्यत्व रद्द करण्यासाठी जिल्हाधिकारी यांच्याकडे याचिका दाखल केली असल्याची माहिती बंडावार यांनी दिली.जिल्हाध्यक्ष नागदेवे हे जिल्ह्याच्या पक्षीय राजकारणात गटबाजी करीत असून व्यावसायिक राजकारणाला खत पाणी घालत आहेत. त्यामुळे पक्ष संघटनेला धोका निर्माण होत आहे. नागदेवे यांच्या जिल्हाध्यक्ष पदाच्या राजीनाम्यासाठी आपण पक्षाच्या वरिष्ठ नेत्यांकडे तक्रार करणार असल्याचेही बंडावार यांनी यावेळी सांगितले. पत्रकार परिषदेला चामोर्शीचे पं.स. सदस्य रंजना कुमरे, मनिषा दुधबावरे, मिनाक्षी देवगडे आदी उपस्थित होते. (स्थानिक प्रतिनिधी)दुधबळेंना अभय, आमच्यावर मात्र कारवाईलोकसभा, विधानसभा निवडणुकीच्या काळात तसेच जि.प. अध्यक्ष, उपाध्यक्ष, सभापती पदाच्या निवडणुकीच्या वेळी भाजपचे जि.प. सदस्य डॉ. तामदेव दुधबळे व संध्या दुधबळे, केशव भांडेकर यांनी पक्षाच्या विरोधात खुलेआम काम केले. पक्षाचे आदेश मानले नाही. परंतु पक्षाच्या जिल्हाध्यक्षांनी त्यांच्याविरोधात आजतागायत पक्षविरोधी कारवाई संदर्भात कोणतीही भूमिका घेतली नाही. कारवाई केली नाही. भारतीय जनता पक्षात जिल्हाध्यक्ष नागदेवे हे पक्षपातीपणाची भूमिका घेत असल्याचा थेट आरोप माजी पं.स. उपसभापती मनमोहन बंडावार व पं.स. गटनेते रेवनाथ कुसराम यांनी पत्रकार परिषदेत केला.