कार अपघातात एक ठार, चार जखमी

कारचालकाचे नियंत्रण सुटल्याने कारने झाडाला धडक दिली.

जामगिरी वळणावर अपघात : जिल्हा सामान्य रुग्णालयात भरती लोकमत न्यूज नेटवर्क आष्टी : कारचालकाचे नियंत्रण सुटल्याने कारने झाडाला धडक दिली. या अपघातात एक ठार तर चारजण जखमी झाल्याची घटना १८ जून रोजी रात्री १० वाजताच्या सुमारास चामोर्शी-आष्टी मार्गावर जामगिरी वळणावर घडली. अ‍ॅड. डॉ. प्रवीण फुलझेले (४०) रा. गडचिरोली असे मृतकाचे नाव आहे. तर जखमीमध्ये पत्रू झाडे (४०), मिलींद वाकडे (२३), कारचालक विजय अशोक दुर्गे (३५), महेश बोरकर (३५) सर्व रा. गडचिरोली अशी जखमींची नावे आहेत. जखमींना उपचारासाठी गडचिरोली जिल्हा रुग्णालयात भरती करण्यात आले. गोकुलनगर येथील विजय अशोक दुर्गे हे एमएच-३३-२८६ क्रमांकाची कार घेऊन अंत्यसंस्कारासाठी इतर चौघांना घेऊन गेले होते. अंत्यसंस्कार आटोपून रात्रीच्या सुमारास गडचिरोलीकडे परत येत होते. जामगिरीनजीकच्या वळणावर अचानक समोरून अवजड वाहन आले. यामुळे वाहनचालक विजय दुर्गे यांचे वाहनावरील नियंत्रण सुटले. वाहन तीन ते चारवेळा पलटले व रस्त्याच्या बाजूला असलेल्या झाडाला धडकले. या अपघातात डॉ. प्रवीण फुलझेले हे जागीच ठार झाले. तर इतर जण जखमी झाले आहेत. मिलींद वाकडे यांच्या पायाला जबर मार लागला आहे. याबाबतची तक्रार पोलिसांमध्ये करण्यात आली आहे. पुढील तपास पोलीस करीत आहेत. काही जखमींना नागपूर येथेही हलविण्यात आले आहे.