कंत्राटी पदांना प्रथमच सामाजिक आरक्षण लागू : सार्वजनिक आरोग्य विभागाचा निर्णयगडचिरोली : उमेदवारांचे शैक्षणिक अहर्ता, अनुभव, वय आदी बाबतच्या पात्रता तपासून गुणवत्तेनुसार राष्ट्रीय ग्रामीण आरोग्य अभियानांतर्गत विविध स्वरूपाचे रिक्त पदे भरण्यात येत होती. मात्र आता एनआरएचएमची सर्व रिक्त पदे सामाजिक आरक्षणानुसार भरण्यात येणार आहे. या संदर्भात राज्याच्या सार्वजनिक आरोग्य विभागाने ८ जुलै २०१५ रोजी नवा शासन निर्णय निर्गमित करून एनआरएचएमच्या कंत्राटी पदांना सामाजिक आरक्षण लागू केले आहे. त्यामुळे आता एनआरएचएमची सर्व कंत्राटी पदे सामाजिक आरक्षणानुसार भरली जाणार आहे. राज्यामध्ये केंद्रपुरस्कृत राष्ट्रीय आरोग्य अभियान कार्यान्वित करण्यात आली असून या अभियानात राष्ट्रीय ग्रामीण आरोग्य अभियान, राष्ट्रीय नागरी आरोगय अभियान व राष्ट्रीय रोग नियंत्रक/प्रतिबंधक कार्यक्रम या योजनांचा समावेश होतो. केंद्र शासनाने राष्ट्रीय आरोग्य अभियानास २०१७ पर्यंत मुदतवाढ दिली आहे. शासन निर्णयानुसार अनुसूचित जातीकरिता १३ टक्के, अनुसूचित जमातीकरिता सात टक्के, विमुक्त जाती अ साठी तीन टक्के, भटक्या जमाती ब ३.५ टक्के, भटक्या जमाती ड दोन टक्के, विशेष मागास प्रवर्ग दोन टक्के व ओबीसी प्रवर्गासाठी १९ टक्के आरक्षण लागू करण्यात आले आहे.
एनआरएचएमची कंत्राटी पदे आरक्षणानुसार भरणार
By admin | Updated: July 10, 2015 02:03 IST