महेंद्र चचाणे देसाईगंजशासकीय योजनांमधील गैरव्यवहार कमी करून पारदर्शकता आणण्याच्या उद्देशाने प्रत्येक नागरिकाला आधार कार्ड देण्याची मोहीम सन २०११ पासून सुरू करण्यात आली. आधार कार्ड तयार करण्याचे काम महाआॅनलाईन अंतर्गत केंद्र संचालकांना देण्यात आले आहे. आधार कार्ड नोंदणी मोफत करावयाची आहे. मात्र देसाईगंज शहरात दोन्ही केंद्रात आधार कार्ड नोंदणीसाठी प्रत्येक नागरिकांकडून ५० रूपये घेऊन केंद्र संचालक आर्थिक लूट करीत असल्याचे लोकमत प्रतिनिधीने शुक्रवारी केलेल्या स्टिंग आॅपरेशनमध्ये दिसून आले.देसाईगंज शहरात आधार कार्ड नोंदणीदरम्यान अनेक नागरिकांना आधार कार्ड काढण्याची पावती न देता केवळ क्रमांक लिहून दिला जात असल्याचीही बाब स्टिंग आॅपरेशनमध्ये दिसून आली. मात्र सदर बाब तहसील कार्यालयीन प्रशासनाला माहित असूनही आर्थिक लूट करणाऱ्या केंद्र संचालकावर कोणत्याही प्रकारची कारवाई होत नसल्याने तालुका प्रशासनाच्या कार्यप्रणाली प्रश्नचिन्ह निर्माण झाले आहे.केंद्र शासनाने अतिशय अभिनव उपक्रमाद्वारे भारतीय विशिष्ट ओळख प्राधिकरण तयार करून जिल्हासह राज्यभरात सन २०११ पासून नोंदणी मोहिमेला शुभारंभ केला. प्रत्येक भारतीयांना स्वतंत्र ओळख सांगणारा १२ आकडी क्रमांक दिला जात आहे. केंद्र व राज्य सरकारने प्रत्येक योजनेचा लाभ घेण्यासाठी आधार कार्ड आवश्यक केले आहे. तसेच प्रत्येक विद्यार्थ्याला आणि गॅसच्या सबसीडीचा लाभ घेण्यासाठी आधार कार्ड आवश्यक केले आहे. आधार कार्ड केंद्रातील संगणक चालकांनी प्रत्येक नागरिकांकडून ५० रूपये वसूल करण्याचा सपाटा सुरू केला आहे. त्यामुळे शासनाच्या सूचनांना काळीमा फासला जात आहे. आधार कार्डची नोंदणी मोफत करावयाची असताना नोंदणी करताना ५० व तयार झालेले आधार कार्ड देण्यासाठीही पैसे घेत असल्याचे लोकप्रतिनिधीने शुक्रवारी केलेल्या स्टिंग आॅपरेशनमधून दिसून आले.
आधार कार्ड नोंदणीत नागरिकांची लूट
By लोकमत न्यूज नेटवर्क | Updated: June 20, 2015 02:10 IST