दुर्बिण दगड हलविल्याचे चौकशीत निष्पन्न

तालुक्यातील पालोरा येथील बन्सोड यांच्या जमिनीचे मोजमाप करून देताना भूकरमापक जाधव यांनी दुर्बिण दगड दुसऱ्या जागेवर हलविला असल्याचे चौकशीदरम्यान निष्पन्न झाले आहे.

आंदोलनाचा इशारा : भूकरमापकावर कारवाई कराआरमोरी : तालुक्यातील पालोरा येथील बन्सोड यांच्या जमिनीचे मोजमाप करून देताना भूकरमापक जाधव यांनी दुर्बिण दगड दुसऱ्या जागेवर हलविला असल्याचे चौकशीदरम्यान निष्पन्न झाले आहे. त्यामुळे जाधव यांच्यावर कारवाई करावी, अशी मागणी अन्यायग्रस्त शेतकऱ्यांनी जिल्हाधिकाऱ्यांकडे केली आहे. पालोरा येथील शेतकरी बन्सोड यांनी भूमापक कार्यालयाकडे केलेल्या अर्जानुसार भूकरमापक जाधव यांनी २३ फेब्रुवारी २०१५ रोजी मोजणी करून दिली. मात्र लगतचे शेतकरी तान्हाजी चिलबुले, नत्थू जिभकाटे, प्रल्हाद मेश्राम, शीलाबाई चिलबुले, थूलकन्या मेश्राम यांना याबाबत कोणतेही नोटीस दिले नाही. त्याचबरोबर दुर्बिण दगड ५० मिटरने सरकवून लगतधारक कास्तरांची संपूर्ण जागा बन्सोड यांना मोजून दिली होती. हा प्रकार लक्षात आल्यानंतर अन्यायग्रस्त शेतकऱ्यांनी जिल्हाधिकारी यांच्याकडे याबाबतची तक्रार केली होती. जिल्हाधिकाऱ्यांनी याबाबत चौकशीचे आदेश दिले होते. आदेशानुसार भूमीअभिलेख कार्यालयाचे उपअधीक्षक यांच्या मार्फत २४ जून रोजी प्रत्यक्ष घटनास्थळावर जाऊन चौकशी करण्यात आली. यावेळी तलाठी नकाशानुसार सर्वे क्र. १३७ मध्ये शेतात नमूद असलेला दुर्बिण दगड सर्वे क्र. १३९ च्या शेतात असल्याचे निदर्शनास आले. हा सर्व प्रकार भूकरमापक जाधव यांनी जाणुनबुजून केला आहे. जमीन मापनानंतर बन्सोड व इतर शेतकऱ्यांमध्ये प्रचंड प्रमाणात वाद निर्माण झाले होते. जाधव यांनी हे कृत्य आर्थिक लाभापोटी केले असल्याचा आरोप लगतधारक शेतकऱ्यांनी केला आहे. अशा प्रकारांवर आळा घालण्यासाठी जिल्हाधिकाऱ्यांनी जाधव यांच्यावर निलंबनाची कारवाई करावी, अशी मागणी जिल्हाधिकाऱ्यांना दिलेल्या निवेदनातून तान्हाजी चिलबुले, नत्थू जिभकाटे, प्रल्हाद मेश्राम, शीला चिलबुले, थूलकन्या मेश्राम यांनी जिल्हाधिकाऱ्यांना दिलेल्या निवेदनातून केली आहे. अन्यथा तीव्र आंदोलन करण्याचा इशारा दिला आहे. जाधव यांनी यापूर्वी केलेल्या इतरही जमिनींच्या सर्वेक्षणाची चौकशी करण्यात यावी, अशी मागणी शेतकऱ्यांनी केली आहे. (प्रतिनिधी)