दारूमुक्त होण्यासाठी ६१ रुग्णांचा पुढाकार

दारूच्या आहारी गेलेल्या रुग्णांना लवकरच शारीरिक दुष्परिणाम दिसून येतात. त्या रुग्णाला उपचार घेण्यास प्रोत्साहित करणे आवश्यक असते. पूर्ण उपचार घेतलेल्या रुग्णांना दारूमुक्त होण्यास मदत मिळत असते. यासाठीच मुक्तिपथ अभियानाद्वारे गाव पातळी व तालुका पातळीवर शिबिरांचे आयोजन केल्या जाते. शुक्रवार, १९ फेब्रुवारी रोजी आलापल्ली शहराजवळील मुक्तिपथ तालुका कार्यालयात २९ रुग्णांनी क्लिनिकला भेट देऊन उपचार घेतला. सिरोंचातील रामाराव दुधीवार यांच्या घरी असलेल्या तालुका कार्यालयात १४, चामोर्शी येथील पोस्ट ऑफिस जवळील कार्यालयात १८ रुग्णांवर उपचार करण्यात आले. या तीन तालुक्यात क्लिनिकच्या माध्यमातून एकूण ६१ रुग्णांनी उपचार घेत दारू सोडण्याचा निर्धार केला. सोबतच रुग्णांना समुपदेशन करण्यात येते. दारूची सवय कशी लागते, शरीरावर कोणते दुष्परिणाम दिसतात, धोक्याचे घटक, नियमित औषधोपचार घेणे आदींची माहिती रुग्णांना देण्यात आली.