लाेकमत न्यूज नेटवर्क
गडचिराेली : जिल्ह्यात अवैधरित्या सुरू असलेल्या देशी-विदेशी आणि माेहफूल दारूच्या विक्रीला आता ताडीची साथ मिळाली आहे. दारूपेक्षाही दुर्गम भागातील अस्सल ताडी म्हणून शहरी भागातील लाेकांची माेठी पसंती आहे. दुर्गम भागातून कॅन तसेच बाटल्यांमध्ये ताडीची शहरी भागात आयात हाेत आहे. ताडी विक्रीतून एटापल्लीसारख्या दुर्गम भागातील नागरिकांना मोठा राेजगार मिळत आहे.
अहेरी उपविभागात ताडाच्या झाडांची संख्या माेठी आहे. एटापल्ली तालुक्याच्या कसनसूर, ताेडसा परिसरात राहणारे आदिवासी व बिगर आदिवासी नागरिक जंगलात जाऊन झाडापासून ताडी काढतात. ही ताडी रस्त्यालगत तसेच चाैकाचाैकात विकल्या जाते. विशेष म्हणजे, शासनाच्या सर्वच विभागातील कर्मचारी यात ताडीची आवर्जुन खरेदी करतात. आराेग्यासाठी अतिशय लाभदायक व गुणकारी असलेल्या ताडीला गेल्या १५ ते २० दिवसांपासून मागणी वाढली आहे. अहेरी उपविभागासह काेरची तालुक्यात तसेच धानाेरा तालुक्यात अस्सल ताडी नागरिकांना प्राप्त हाेत आहे. ताडीविक्रीला शासनाकडून कायद्याने सध्यातरी परवानगी नाही. जिल्ह्यात एकही नाेंदणीकृत परवानाप्राप्त ताडीचे दुकान नाही. मात्र, १७ ऑक्टाेबर २००२ च्या न्यायालयाच्या आदेशानुसार, ताडीच्या दुकानाला परवाना देण्यासाठी निर्णय घेण्यासंदर्भात नवी शिफारस लागू करण्याचे निर्देश देण्यात आले आहे. या निर्देशानुसार ताडीची विक्री करण्यासाठी दुकानाला रितसर परवानगी देऊन त्याचे नूतनीकरण करण्याचे निर्देश देण्यात आले आहे. त्यामुळे ताडीच्या दुकानांना परवाना प्राप्त करणे आवश्यक आहे. यासाठी शासनाने १० जणांची समिती गठीत केल्याची माहिती आहे.
बाॅक्स....
पावडर मिश्रित ताडी आराेग्यासाठी घातक
गडचिराेली जिल्हा मुख्यालय तसेच चामाेर्शी, आरमाेरी, देसाईगंज या तालुकास्थळी येऊन काही लाेक पावडर मिश्रित ताडीची विक्री करीत असल्याची माहिती मिळाली आहे. गडचिराेली येथील गांधी चाैक तसेच मुख्य मार्गावर अशा प्रकारची ताडी विकल्या जाते. खरपुंडी नाक्याजवळ तसेच मार्गावर अनेक ठिकाणी विकली जात आहे. चांदाळा परिसरातही अशा प्रकारच्या ताडीची विक्री केली जात आहे. पावडर मिश्रित ताडी आराेग्यासाठी घातक ठरू शकते.