भरधाव ट्रकची हायमॉस्ट दिव्याला धडक :

बल्लारपूर येथील एमएच-३४-एम-२६३६ क्रमांकाचा ट्रक चामोर्शीवरून गडचिरोलीकडे येत होता.

भरधाव ट्रकची हायमॉस्ट दिव्याला धडक : बल्लारपूर येथील एमएच-३४-एम-२६३६ क्रमांकाचा ट्रक चामोर्शीवरून गडचिरोलीकडे येत होता. दरम्यान या भरधाव ट्रकचा टायर फुटल्याने चामोर्शी मार्गावर वीज वितरण कंपनीच्या कार्यालयासमोरील नगर पालिका प्रशासनाने बसविलेल्या हायमॉस्ट दिव्याला मंगळवारी मध्यरात्रीच्या सुमारास ट्रकने जबर धडक दिली. विशेष म्हणजे या भरधाव ट्रकने सदर हायमॉस्ट दिव्याला १२ ते १५ फूट फरफटत नेले. सदर हायमॉस्ट दिवा विद्युत तारांवर पडल्यामुळे गोकुलनगर व कन्नमवार नगरातील विद्युत पुरवठा खंडित झाला. नगर पालिकेच्या विद्युत विभागाच्या कर्मचाऱ्यांनी या घटनेचा पंचनामा केला. यात नगर पालिका प्रशासनाचे पाच लाख रूपयांचे नुकसान झाल्याचे त्यांनी अहवालात नमूद केले आहे. या संदर्भात संबंधित ट्रकचालकाच्या विरोधात पालिका प्रशासनाच्या वतीने गडचिरोली पोलीस ठाण्यात तक्रार दाखल करण्यात येणार असल्याची माहिती पालिकेचे मुख्याधिकारी कृष्णा निपाने यांनी लोकमतशी बोलताना दिली.