आरोग्य कर्मचाऱ्यांचे आंदोलन

विविध मागण्यांसाठी जिल्हा परिषद व राज्य सरकारी आरोग्य कर्मचाऱ्यांनी जिल्हाधिकारी कार्यालयासमोर सोमवारी धरणे आंदोलन केले. या आंदोलनाला इतरही कर्मचारी संघटनांनी पाठिंबा दर्शविला.

इतर संघटनांचा पाठिंबा : जिल्हाधिकारी कार्यालयासमोर दिले धरणेगडचिरोली : विविध मागण्यांसाठी जिल्हा परिषद व राज्य सरकारी आरोग्य कर्मचाऱ्यांनी जिल्हाधिकारी कार्यालयासमोर सोमवारी धरणे आंदोलन केले. या आंदोलनाला इतरही कर्मचारी संघटनांनी पाठिंबा दर्शविला. केंद्र शासनाच्या निकषाप्रमाणे प्रत्येक प्राथमिक आरोग्य केंद्राला दोन एलएचव्हीची पदे मंजूर करण्यात यावी. आरोग्य सहाय्यक पदाचे ग्रेड वेतन २ हजार ८०० रूपये करण्यात यावे. आरोग्य कर्मचाऱ्यांच्या पदनाम बदलाचे आदेश निर्गमित करावे, आरोग्य सेवकांची शैक्षणिक पात्रता बारावी व प्रशिक्षणाचा कालावधी २ वर्षाचा करावा, एनआरएचएमचे काम देण्यात येऊ नये, प्राथमिक आरोग्य केंद्रामध्ये बाह्यरूग्ण व आंतररूग्ण विभागासाठी स्वतंत्र पदे भरावी, अर्धवेळ स्त्री परिचारांना किमान १० हजार रूपये वेतन द्यावेत व ग्रा.प. कर्मचाऱ्यांप्रमाणे वर्ग ४ च्या पदावर सामावून घ्यावे, आदिवासी व नक्षलग्रस्त जिल्ह्यात स्त्री कर्मचाऱ्यांना लागू असलेला हार्डशीप अलाऊन्स पुरूष कर्मचाऱ्यांनाही लागू करावा, हिवताप विभागात निवड समितीने घेतलेल्या १६९ आरोग्य सेवेकांची सेवा नियमित करावी, प्रयोगशाळा तंत्रज्ञ यांना भविष्यात पदोन्नतीची संधी उपलब्ध नाही. अशा पदवीधारक प्रयोगशाळा तंत्रज्ञांना कालबध्द वेतनश्रेणी लागू करावी आदी मागण्यांसाठी जिल्हाधिकारी कार्यालयासमोर धरणे आंदोलन करण्यात आले. या आंदोलनाला अनेक संघटनांनी पाठिंबा दिला. आंदोलनात शेकडो आरोग्य कर्मचाऱ्यांनी सहभाग घेतला. धरणे आंदोलनानंतर जिल्हाधिकाऱ्यांना निवेदन सादर करण्यात आले. १६ जुलै रोजी मुंबई येथे धरणे आंदोलन करण्यात येणार आहे. यानंतरही मागण्या सोडविण्यासाठी शासनाने सकारात्मक निर्णय न घेतल्यास २१ जुलैपासून संपूर्ण कामबंद आंदोलन करण्याचा इशारा दिला आहे. आंदोलनाचे नेतृत्व महाराष्ट्र राज्य जिल्हा परिषद, आरोग्य सेवा कर्मचारी संघटनेचे जिल्हाध्यक्ष सुरेंद्र खरवडे, कार्याध्यक्ष आशांद सहारे यांनी केले. यावेळी कोटरंगे, सचिव विनोद सोनकुसरे, कोषाध्यक्ष अनिल मंगर, उपाध्यक्ष टी. डी. आंबोणे, जी. वाय. पाल, आनंद मोडक, महेंद्र हुलके, प्रसिध्दी प्रमुख मोहन भुरसे, पी. डी. कोठारे, सी. एच. लडके, प्रविण गेडाम, शेख फुलझेले, नर्सेस संघटनेच्या प्रभारी अध्यक्ष कल्पना साखरे, कार्याध्यक्ष डी. टी. भुरे, सचिव विमल अंबाडकर आदी उपस्थित होते. (नगर प्रतिनिधी)