अरतताेंडी येथे ग्रामसेवक देशमुख यांचा सत्कार

कुरखेडा : गट ग्रामपंचायत अरततोंडी येथे कार्यरत तालुका ग्रामसेवक संघटनेचे अध्यक्ष महेंद्र देशमुख यांना राज्य शासनाकडून ‘राज्यस्तरीय आदर्श ग्रामसेवक पुरस्कार’ जाहीर झाला आहे. त्याबद्दल ग्रामपंचायत कार्यालयात पदाधिकारी व कर्मचाऱ्यांतर्फे देशमुख यांचा सत्कार करण्यात आला. महेंद्र देशमुख हे गेल्या ९ वर्षांपासून अरततोंडी येथे कार्यरत आहेत. त्यांच्या कार्यकाळात ग्रामपंचायतीला संत गाडगेबाबा ग्रामस्वच्छता अभियानात सन २०१५ ते २०१९-२०पर्यंत सलग जिल्हास्तरीय प्रथम व द्वितीय क्रमांकाचा पुरस्कार मिळाला आहे. स्मार्ट ग्राम पुरस्कार, आयएसओ नामांकन, गावात नाविन्यपूर्ण उपक्रमांतर्गत पाणी शुद्धीकरण प्रकल्प, रोजगार हमी याेजनेची विविध कामे गावात प्रभावीपणे राबविल्याबद्दल देशमुख यांना हा पुरस्कार जाहीर झाला आहे. ग्रामपंचायत कार्यालयात पार पडलेल्या या सत्कार कार्यक्रमाला सरपंच विजय तुलावी, उपसरपंच साईनाथ खुणे, कृषी सहाय्यक कुळमेथे, रोजगार सेवक दिलीप वैरागडे, संगणक परिचालक रंगनाथ मुंगणकर, पाणीपुरवठा कर्मचारी वासुदेव लोहंबरे, खटेश्वर मडावी, टी. एम. कोटांगले, सरिता नैताम उपस्थित हाेते.