कुरखेडा शहरातील समस्या सोडवा

पावसाळ्याला सुरुवात झाली असून साथीचे रोग पसरू नयेत यासाठी शहरातील समस्या सोडविण्यात याव्या,

आंदोलनाचा दिला इशारा : भारतीय जनता पार्टीच्या वतीने नगर पंचायतीच्या प्रशासकांना निवेदनकुरखेडा : पावसाळ्याला सुरुवात झाली असून साथीचे रोग पसरू नयेत यासाठी शहरातील समस्या सोडविण्यात याव्या, अशी मागणी भारतीय जनता पार्टीच्या वतीने प्रशासक यू. एम. तोडसाम यांना दिलेल्या निवेदनातून केली आहे. शहरातील बहुतांश पथदिवे बंद आहेत. पावसाळ्यात साप, विंचू, कीटक बाहेर निघतात. त्यामुळे अंधारात त्यांच्याकडून दंश होण्याची शक्यता नाकारता येत नाही. नगर पंचायतीने प्राधान्याने पथदिवे लावण्यासाठी निधी उपलब्ध करून देऊन पथदिवे लावावे. शहरातील अनेक नाल्या मागील दोन वर्षांपासून उपसण्यात आल्या नाही. परिणामी नाल्यांमध्ये मोठ्या प्रमाणामध्ये गाळ व कचरा जमा झाला आहे. पावसाचे पाणी वाहून जाण्यास अडथळा निर्माण होत आहे. परिणामी डासांची पैदास वाढण्याची शक्यता असल्याने नाल्यांची दुरूस्ती करण्यात यावी, अशी मागणी करण्यात आली. विहिरीमध्ये ब्लिचिंग पावडर टाकण्यात यावे, वारंवार खंडीत होणारा वीज पुरवठा सुरळीत करण्यात यावा, अनेक रस्त्यांवर बांधकामाचे साहित्य ठेवले आहेत. त्यामुळे वाहतुकीस अडथळा निर्माण होत आहे. सदर साहित्य उचलण्यात यावे, अशी मागणी करण्यात आली. यावेळी भाजपा तालुकाध्यक्ष राम लांजेवार, विलास गावंडे, गणपत सोनकुसरे, चांगदेव फाये, रवी गोटेफोडे, नागेश फाये, रामहरी उगले, मुजाहीद शेख, लता सहारे आदी उपस्थित होते. शहरातील समस्या तत्काळ न सोडविल्यास आंदोलन करण्याचा इशारा भारतीय जनता पार्टीच्या वतीने देण्यात आला आहे. (तालुका प्रतिनिधी)