कृषी क्षेत्र संपूर्ण हवामानाशी निगडित असल्याने शेतकऱ्यांना यथायोग्य मार्गदर्शन करून नुकसान टाळण्यासाठी कृषी विभागाची निर्मिती करण्यात आली आहे. यात कृषी सेवकापासून ते पंचायत समिती स्तरावर कृषी विस्तार अधिकारी, कृषी विकास अधिकारी तर तालुका स्तरावर तालुका कृषी अधिकारी तसेच उपविभागीय कृषी अधिकारी अशा कृषी विभागाशी संबंधित अधिकाऱ्यांच्या नियुक्त्या करण्यात आल्या आहेत. कृषी क्षेत्राशी निगडित इत्थंभूत माहिती शेतकऱ्यांना पुरवून मशागत, कीड नियंत्रणाबाबत यथायोग्य माहिती पुरविण्याची जबाबदारी या विभागावर सोपविण्यात आली आहे. यासाठी कृषी क्षेत्राशी निगडित ज्ञान असलेल्या व त्याचे शिक्षण व प्रशिक्षण घेतलेल्या व्यक्तींनाच या विभागात नियुक्त्या देण्यात येत आहेत. असे असताना मागील कित्येक वर्षांपासून मावा, खोडकिडा, तुडतुडा तर कधी कडा करप्यामुळे उभे धानपीक नष्ट होण्याचा सिलसिला सुरूच आहे.
कृषी विभागाचे नियोजन फेल का ठरते, असा प्रश्न यानिमित्ताने उपस्थित केल्या जाऊ लागला आहे. कृषी विभागात या क्षेत्रातील पारंगत अधिकारी, कर्मचाऱ्यांच्या नियुक्त्या करूनही शेतकऱ्यांना त्यांच्या ज्ञानाचा कवडीचाही फायदा होणार नसेल, तर संबंधित विभागाची निर्मिती कशासाठी, असाही प्रश्न विचारला जाऊ लागला आहे. शेतकऱ्यांना उपलब्ध करून देण्यात येत असलेले बी-बियाणे, रासायनिक खते यांचा योग्य वापर करण्यासंदर्भात कृषी विभागाचे यथायोग्य मार्गदर्शन लाभणे अपेक्षित आहे. किती कृषी अधिकाऱ्यांनी शेतकऱ्यांच्या बांधावर जाऊन कीड नियंत्रणासाठी शेतकऱ्यांना यथायोग्य मार्गदर्शन करून पीक रोगमुक्त करण्यासाठी प्रयत्न चालवले आहेत. याचा लेखाजोखा तपासणे आता गरजेचे झाले आहे.