गडचिरोली : राज्य निवडणूक आयोगाच्या आदेशानुसार आॅगस्ट ते आॅक्टोबर २०१५ या कालावधीत मुदत संपणाऱ्या गडचिरोली जिल्ह्यातील भामरागड तालुक्यातील पल्ली, मुलचेरा तालुक्यातील बोलेपल्ली व आंबटपल्ली या तीन ग्रामपंचायतीच्या सार्वत्रिक निवडणुकांचा कार्यक्रम जाहीर करण्यात आला आहे.निवडणूक कार्यक्रमानुसार नामनिर्देशन ४ ते १० जुलै या कालावधीत नामनिर्देशनपत्र सकाळी ११ ते दुपारी ४ या वेळेत स्वीकारले जाणार आहे. मतदान दिनांक २५ जुलै रोजी सकाळी ७.३० ते दुपारी ३ वाजेपर्यंत होणार असून मतमोजणी संबंधित तहसील कार्यालयात २७ जुलै रोजी सकाळी १० वाजता होणार आहे. २३ जून रोजी रात्री १२ वाजतापासून निवडणूक होणाऱ्या ग्रामपंचायत क्षेत्रात आदर्श आचारसंहिता लागू करण्यात आली आहे. २७ जुलैपर्यंत ही आदर्श आचारसंहिता अंमलात राहील, अशी माहिती जिल्हाधिकारी गडचिरोली यांनी दिली आहे. नागरिकांनी कुठल्याही प्रकारची भिती न बाळगता निवडणूक कामात हिरहिरीने भाग घेऊन मतदानात सहभागी व्हावे, असे आवाहन जिल्हाधिकारी गडचिरोली यांनी केले आहे. राज्य निवडणूक आयोगाने निवडणूक कार्यक्रम घोषीत केलेले तिन्ही गावे संवेदनशील भागातील आहेत. (जिल्हा प्रतिनिधी)
पल्ली, बोलेपल्ली आंबटपल्लीत निवडणूक
By admin | Updated: June 26, 2015 00:11 IST