वाहक व चालकांअभावी नवीन शेड्यूलला ग्रहण

उन्हाळ्यातील गर्दीच्या हंगामाचा फायदा उचलण्याबरोबरच मानव विकास मिशनच्या बसफेऱ्यांना काम देण्याच्या उद्देशाने ...

गडचिरोली : उन्हाळ्यातील गर्दीच्या हंगामाचा फायदा उचलण्याबरोबरच मानव विकास मिशनच्या बसफेऱ्यांना काम देण्याच्या उद्देशाने गडचिरोली आगारातून वाढीव शेड्यूल तयार करण्याचा प्रयत्न केला जात आहे. मात्र रिक्त असलेल्या वाहक व चालकांच्या पदामुळे वाढीव शेड्यूल राबविताना अडचण निर्माण होत आहे. उन्हाळ्यामध्ये लग्नसराईला सुरुवात होते. त्याचबरोबर शेतीचा हंगाम संपत असल्याने उन्हाळ्याच्या कालावधीत सर्वाधिक प्रवास केला जातो. त्यामुळे या कालावधीला एसटीचे कर्मचारी गर्दीचा हंगाम म्हणून ओळखतात. उन्हाळ्यात सर्वच शाळा बंद राहत असल्याने मानव विकास मिशनच्या बसच्या फेऱ्या बंधनकारक मार्गावर चालवाव्या लागत नाही. त्यामुळे या बसला काम देणे आवश्यक आहे. यासाठी गडचिरोली आगाराच्या वतीने नवीन अतिरिक्त शेड्यूल तयार केले जात आहे. नवीन शेड्यूलनुसार बसगाड्या असल्या तरी वाहक व चालक मिळणे कठीण झाले आहे. गडचिरोली आगारातील वाहक व चालकांची जवळपास २० टक्के पदे रिक्त आहेत. त्यामुळे नियमित शेड्यूलच्या बसगाड्यांनाच कधीकधी कर्मचारी मिळत नाही. तर अतिरिक्त शेड्यूलसाठी कर्मचारी कसे मिळणार असाही प्रश्न काही वाहक व चालकांकडून उपस्थित केला जात आहे.वाहक व चालकांच्या रिक्त पदांमुळे नवीन शेड्यूल राबविण्यास गडचिरोली आगाराला अडचण निर्माण होत असून गर्दीच्या हंगामातील उत्पन्नापासून वंचित राहावे लागत आहे. (नगर प्रतिनिधी)