गडचिरोली : विश्रामपूर- बोदली मार्गावर अवैध दारूची वाहतूक करणाऱ्या दुचाकीचा पाठलाग करून दोन दारूविक्रेत्यांकडून २५ लिटर मोहफुलाची दारू व दुचाकी जप्त करण्यात आली. याप्रकरणी अशोक कुकुडकर रा. बोदली, हरिदास भुरसे रा. ठाणेगाव या दोघांवर गडचिरोली पोलीस ठाण्यात गुन्हे दाखल करण्यात आले आहे. ही कारवाई गडचिरोली पोलीस व मुक्तिपथ तालुका चमूने संयुक्तरित्या केली आहे.
विश्रामपूर-बोदली मार्गावरून संशयितरित्या दुचाकी वाहन जात असल्याचे पोलिसांच्या लक्षात आले. पोलिसांनी त्या दुचाकीचा पाठलाग करून त्यांच्याकडील मालाची तपासणी केली. यावेळी पाण्याच्या बाटलीतून दारूची वाहतूक होत असल्याचे लक्षात आले. अशोक कुकुडकर व हरिदास भुरसे या दोघांकडून ५ हजार रुपये किमतीची मोहफुलाची दारू व ४० हजार रुपये किमतीचे दुचाकी वाहन असा एकूण ४५ हजारांचा मुद्देमाल जप्त करण्यात आला. सदर दारू बोदली येथे विक्रीसाठी आणत असल्याची माहीती दारूविक्रेत्यानी दिली. याप्रकरणी दोघांवर गडचिरोली पोलीस ठाण्यात गुन्हा दाखल करण्यात आला आहे. ही कारवाई गडचिरोलीचे पोलीस निरीक्षक दामदेव मंडलवार यांच्या मार्गदर्शनाखाली बिट अंमलदार प्रभाकर भेंडारे, शकील सय्यद, मुक्तिपथ तालुका संघटक अमोल वाकुडकर, उपसंघटक रेवनाथ मेश्राम यांनी केली.