शाळांवर कारवाईचे संकेत : गट शिक्षणाधिकाऱ्यांच्या पथकाने केली तपासणीगडचिरोली : स्थानिक पंचायत समितीचे गट शिक्षणाधिकारी उद्धव डांगे यांनी शनिवारला शहरातील इंग्रजी माध्यमांच्या काही कॉन्व्हेंटमध्ये जाऊन विद्यार्थ्यांच्या दप्तरांचे वजन तपासले. या तपासणीत इयत्ता पहिली व आठवीच्या विद्यार्थ्यांच्या दप्तरांचे ओझे सर्वात जास्त आढळून आले. दप्तरांचे ओझे जास्त आढळून आलेल्या संबंधित कॉन्व्हेंट व शाळांवर शासकीय नियमानुसार कार्यवाही करण्यात येईल, असे संकेत गट शिक्षणाधिकारी उद्धव डांगे यांनी दिले आहे.शासकीय नियमानुसार इयत्ता पहिलीतील विद्यार्थ्यांच्या दप्तराचे वजन १ हजार ८०० ग्रॅम, इयत्ता दुसरीतील विद्यार्थ्याच्या दप्तराचे वजन १ हजार ७८५ ग्रॅम, इयत्ता तिसरीचे २ हजार ४०० ग्रॅम, इयत्ता चौथीच्या विद्यार्थ्याच्या दप्तरांचे वजन २ हजार ६८५ ग्रॅम, इयत्ता पाचवीसाठी ३ हजार १२५ ग्रॅम, इयत्ता सहावीसाठी ३ हजार १४१ ग्रॅम, सातवीला ३ हजार ३५७ ग्रॅम व इयत्ता आठवीला ३ हजार ४२५ ग्रॅम वजनाच्या दप्तराची अनुमती आहे. मात्र स्कूल आॅफ स्कॉलर शाळेत शनिवारी गट शिक्षणाधिकारी उद्धव डांगे व त्यांच्या पथकाने विद्यार्थ्यांच्या दप्तरांच्या वजनाची नोंद घेतली असता, इयत्ता पहिलीच्या विद्यार्थ्याच्या दप्तराचे वजन साडेचार किलो ग्रॅम व आठवीतील विद्यार्थ्याच्या दप्तराचे वजन साडेसात किलोग्रॅम आढळून आले, अशी माहिती डांगे यांनी दिली. तपासणी पथकात निखील कुमरे, अजितसिंग टांक, डॉ. छाया वाघधरे, मनिषा मुरकुटे, भुवनेश्वरी वाढई, वैशाली धार्मिक सहभागी होते. (प्रतिनिधी)दप्तरांचे ओझे मर्यादित ठेवाअधिक वजनाचे दप्तर वाहून नेताना संबंधित विद्यार्थ्याच्या आरोग्यावर दुष्पपरिणाम होतात. बालवयात अस्थिव्यंगाचा धोका असतो. त्यामुळे शाळांनी विद्यार्थ्यांच्या दप्तराचे ओझे मर्यादित ठेवावे, असे आवाहन गट शिक्षणाधिकारी डांगे यांनी केले आहे. यानंतर विविध शाळांमध्ये तपासणी होणार आहे.
विद्यार्थ्यांच्या दप्तरांचे ओझे आढळले जास्त
By admin | Updated: September 4, 2016 01:49 IST