चामोर्शी : जिल्ह्यातील सर्वात मोठी कृषी उत्पन्न बाजार समिती असलेल्या चामोर्शी बाजार समितीच्या निवडणुकीसाठी सोमवारी प्रचंड उत्साहात मतदान पार पडले. ९५.४१ टक्के मतदारांनी आपल्या मतदानाचा हक्क बजाविला. १५ सप्टेंबर रोजी या निवडणुकीची मतमोजणी चामोर्शी येथील शिक्षक सहकारी पतसंस्थेच्या सभागृहात होणार आहे.गडचिरोली जिल्हा परिषदेचे बांधकाम, वित्तसभापती तथा बाजार समितीचे अध्यक्ष राहिलेले अतुल गण्यारपवार यांच्या नेतृत्वातील शेतकरी विकास पॅनलचा थेट सामना भारतीय जनता पक्षाच्या पॅनलशी झाला. ग्रामपंचायत मतदार संघात सहा मतदान केंद्रांवर मतदान पार पडले. कुनघाडा मतदान केंद्रावर ९९ पैकी ९०, चामोर्शी मतदान केंद्रावर २५८ पैकी २३९, घोट मतदान केंद्रावर १६६ पैकी १२८, मुलचेरा मतदान केंद्रावर ७५ पैकी ७२, आष्टी मतदान केंद्रावर १८७ पैकी १७३ मतदारांनी मतदानाचा हक्क बजाविला. एकूण ७८५ पैकी ७०७ म्हणजे ९० टक्के मतदारांनी ग्रामपंचायत मतदार संघात मतदान केले. सेवा सहकारी संस्था मतदार संघात कुनघाडा मतदान केंद्रावर ५५ पैकी ५१, चामोर्शी २४३ पैकी २३४, घोट १०० पैकी ९३, मुलचेरा २९ पैकी २७ तर आष्टी मतदान केंद्रावर १२८ पैकी १२६ मतदारांनी आपल्या मतदानाचा हक्क बजाविला. ग्रामपंचायत मतदार संघात ५५५ पैकी ५३४ मतदारांनी म्हणजेच ९६.२२ टक्के मतदारांनी आपल्या मतदानाचा हक्क बजाविला.हमाल मापारी मतदार संघात कुनघाडा बुथवर ५८, चामोर्शी बुथवर १४९ असे एकूण २०७ मतदारांनी मतदान केले. १०० टक्के मतदान या गटात झाले. निवडणुकीपूर्वी व मतदानादरम्यान तणावपूर्ण वातावरण असले तरी मतदान शांततेत पार पडले.निवडणूक निर्णय अधिकारी म्हणून प्रवीण निवावे यांनी काम पाहिले. मतदानादरम्यान पोलीस निरीक्षक किरण अवचार यांच्या मार्गदर्शनात मोठा पोलीस बंदोबस्त ठेवण्यात आला होता. (तालुका प्रतिनिधी)
चामोर्शी बाजार समितीसाठी ९५.४१ टक्के मतदान
By admin | Updated: September 15, 2015 03:38 IST