८ आरोपींना २६ सप्टेंबरपर्यंत न्यायालयीन कोठडी

एटापल्लीचे माजी पं. स. उपसभापती केशव पुडो यांच्या अपहरण प्रकरणी अहेरी न्यायालयाने ८ आरोपींना २६ पर्यंत न्यायालयीन कोठडी सुनावली आहे.

एटापल्ली : एटापल्लीचे माजी पं. स. उपसभापती केशव पुडो यांच्या अपहरण प्रकरणी अहेरी न्यायालयाने ८ आरोपींना २६ पर्यंत न्यायालयीन कोठडी सुनावली आहे. न्यायालयीन कोठडी सुनावण्यात आलेल्या आरोपींमध्ये एटापल्ली पंचायत समितीचे विद्यमान सभापती संजय चरडुके, विनोद चरडुके, विश्वजीत सरकार, नसरू शेख, आशिफ घोनमोडे, महेश मंचावर, सतिश मुप्पलवार रा. सर्व एटापल्ली व दिवाकर नागापुरे रा. पंदेवाही यांचा समावेश आहे. आलापल्लीवरून एटापल्लीकडे चारचाकी वाहनाने सहकाऱ्यांसोबत येत असतांना एटापल्लीचे माजी पं. स. उपसभापती केशव पुडो यांचे वाहन अज्ञात इसमांनी रविवारी सकाळी १०.३० वाजताच्या सुमारास करेम फाट्याजवळ अडवून त्यांचे अपहरण केले होते. यासंदर्भात गयाबाई पुडो यांनी एटापल्ली पोलीस ठाण्यात तक्रार दाखल केली होती. तक्रारीच्या आधारे पोलिसांनी तपास चक्रे फिरवून विद्यमान पं. स. सभापती संजय चरडुके याला १४ सप्टेंबर रोजी अटक केली. त्याच्यावर तसेच या प्रकरणातील उर्वरित ७ ही आरोपींवर एटापल्ली पोलिसांनी कलम ३६५, ३६४, ३४१, १४३, १४७, १४९, ५०४, ५०६ अन्वये गुन्हा दाखल केला होता. त्यानंतर पोलिसांनी १५ सप्टेंबरला संजय चरडुके याला अहेरीच्या न्यायालयात हजर केले. न्यायालयाने त्याला दोन दिवसाची पोलीस कोठडी सुनावली होती. त्यानंतर पोलिसांनी अन्य ७ आरोपींना १५ व १६ सप्टेंबर रोजी अटक करून मंगळवारी अहेरीच्या न्यायालयात हजर केले. न्यायालयाने सर्व ८ आरोपींना २६ सप्टेंबरपर्यंत न्यायालयीन कोठडी सुनावली आहे.या प्रकरणातील सुमित आत्राम व विक्की आत्राम रा. अहेरी या दोन आरोपींवर एटापल्ली पोलिसांनी गुन्हा दाखल केला आहे. मात्र सदर दोनही आरोपी अद्यापही फरार आहेत. या घटनेचा पुढील तपास एटापल्लीचे उपविभागीय पोलीस अधिकारी दत्ता नलावडे यांच्या मार्गदर्शनाखाली एटापल्ली पोलीस निरीक्षक किरण अवचार करीत आहेत. (तालुका प्रतिनिधी)