Year Ender 2021: सिद्धार्थ ते दिलीप कुमार...; 2021 मध्ये ‘या’ कलाकारांनी घेतला जगाचा निरोप
By ऑनलाइन लोकमत | Published: December 22, 2021 08:00 AM2021-12-22T08:00:00+5:302021-12-22T08:00:02+5:30
Year Ender 2021: बॉलिवूड इंडस्ट्रीनं 2021 या मावळत्या वर्षांत अनेक धक्के पचवले. या वर्षात अनेक प्रसिद्ध कलाकारांनी जगाचा निरोप घेतला.
बॉलिवूड इंडस्ट्रीनं 2021 या मावळत्या वर्षांत अनेक धक्के पचवले. या वर्षात अनेक प्रसिद्ध कलाकारांनी जगाचा निरोप घेतला.
रणधीर कपूर आणि दिवंगत ऋषी कपूर यांचे धाकटे भाऊ राजीव कपूर यांचं 9 फेब्रुवारी रोजी हृदयविकाराच्या झटक्यानं निधन झालं होतं. ‘राम तेरी गंगा मैली’ या चित्रपटातून अपार लोकप्रियता मिळवलेले राजीव कपूर यांच्या निधनाच्या धक्क्यातून कपूर कुटुंब अजूनही सावरलेलं नाहीये.
गतकाळातील अभिनेत्री शशिकला सहगल यांनी 4 एप्रिलला अखेरचा श्वास घेतला. त्या 88 वर्षांच्या होत्या. दीर्घकाळापासून त्या आजारी होत्या.
मराठी आणि बॉलिवूड इंडस्ट्रीतील लोकप्रिय अभिनेते किशोर नांदलस्कर यांनी 20 एप्रिल रोजी जगाचा निरोप घेतला. कोरोनावरील उपचारादरम्यान त्यांची प्राणज्योत मालवली.
नदीम-श्रवण या गोडजोडीतील एक प्रसिद्ध संगीत दिग्दर्शक श्रवण राठोड यांचं 23 एप्रिल रोजी निधन झालं होतं. त्यांना कोरोनाची लागण झाली होती.
लोकप्रिय टीव्ही आणि बॉलिवूड अभिनेता बिक्रमजीत कंवरपाल यांनीही कोरोनामुळे प्राण गमावला. 1 मे रोजी वयाच्या 52 व्या वर्षी त्यांचं निधन झालं.
बॉलिवूडचे ज्येष्ठ अभिनेते दिलीप कुमार यांची 7 जुलैला प्राणज्योत मालवली. वयाच्या 98 व्या वर्षी त्यांनी अखेरचा श्वास घेतला.
टेलिव्हिजनसह मोठा पडदा गाजवणा-या अभिनेत्री सुरेखा सिकरी यांचे 16 जुलै रोजी हृदयविकाराच्या झटक्यानं निधन झालं. त्या 75 वर्षांच्या होत्या.
प्रतिज्ञा या मालिकेत सज्जन सिंहच्या भुमिकेमुळे नावारूपास आलेले अनुपम श्याम यांनी 8 ऑगस्टला जगाचा निरोप घेतला.
2 सप्टेंबरला ‘बिग बॉस 13’चा विजेता सिद्धार्थ शुक्लाचं अकाली निधन झालं. हृदयविकाराचा तीव्र झटका आला आणि तोच त्याच्या मृत्यूला कारणीभूत ठरला.
तारक मेहता का उल्टा चष्मा या मालिकेत नट्टू काकाची भूमिका साकारणारे अभिनेते घनश्याम नायक यांनी 3 ऑक्टोबरला अखेरचा श्वास घेतला. कॅन्सरमुळे त्यांचं निधन झालं.
रामायण या पौराणिक मालिकेत रावणाची भूमिका साकारणारे ज्येष्ठ अभिनेते अरविंद त्रिवेदी यांनी 6 ऑक्टोबरला जगाचा निरोप घेतला.
अनुपमा या मालिकेमुळे नव्यानं चर्चेत आलेल्या अभिनेत्री माधवी गोगटे यांचा 21 नोव्हेंबरला कोरोनामुळे मृत्यू झाला.