- मयूर पठाडेलहान मुलं, त्यातही मुली, किती क्यूट, गोड दिसतात ना! असंही लहान मुलांचं कोडकौतुक करण्यात आपल्याला शब्द पुरे पडत नाहीत आणि त्यांना नटवण्यात, सजवण्यातही आपण कुठलाच कद्रुपणा ठेवत नाही.. ही मुलं आहेत त्यापेक्षा आणखी सुंदर कशी दिसतील यासाठी आपण प्रामाणिक प्रयत्न करीत असतो..या मुलामुलींचे पालक जाऊ द्या, अगदी शेजारपाजारचे आणि येणारे जाणारेही त्यांचे अगदी लाड करीत असतात, त्यांना अनेक गोष्टी आणून देत असतात. मुलींनाही नटायला आवडतंच. मग त्यासाठी पालकही त्यांना नवनवीन कपड्यांपासून तर मेकअपपर्यंत अनेक गोष्टींनी नटवत असतात. याच मेकअपमध्ये बऱ्याचदा असते ती चमचमणारी पावडर. ही पावडणर लावल्यावर मुलं दिसतातही आणखीच गोबरी, गोड...पण सावधान..
नुकत्याच झालेल्या एका पाहणीत आढळून आलं आहे, या पावडरमध्ये अनेकदा विषारी पदार्थही आढळून येतात. हे पदार्थ त्या मुलांच्या आरोग्यासाठी खूपच घातक असतात.किती?अगदी लहान आणि कुमारवयीन, त्यातही नऊ ते बारा या वयातील मुलांना या पावडरमुळे अकाली मृत्यूही येऊ शकतो. अर्थातच यात असलेल्या विषारी पदार्थांचा तुमच्या शरीरावर हळूहळू परिणाम होतो, त्यामुळे अगदी लगेच ही पावडर जीवघेणी ठरत नाही, पण वयाच्या अगदी तिशीत, चाळीशीतही तुम्हाला मृत्यू येऊ शकतो आणि त्याचं कारण ठरू शकते ही पावडर..‘जस्ट शाईन शिमर पावडर’ या नावानं अमेरिकेत विकल्या जाणाऱ्या या पावडरवर त्यामुळे अनेक विक्रत्यांनी स्वत:हून बंदी घातली आहे आणि ही उत्पादनं आपल्या दुकानातून हद्दपार केली आहेत.ही तपासणी सरकारनं किंवा सरकारी संस्थेच्या पुढाकारातून झालेली नाही. कपड्यांचं एक पॉप्युलर स्टोअर आणि एक टीव्ही वाहिनी यांनी यासाठी पुढाकार घेतला. ही पावडर प्रयोगशाळेत तपासणीसाठी दिल्यानंतर त्यात अत्यंत घातक असे विषारी घटक आढळून आले. या पावडरमध्ये काय आढळून आलं?
१- अॅसबेसटॉस हा अत्यंत घातक पदार्थ या पावडरमध्ये आढळून आला.२- याशिवाय बेरिअम, क्रोमिअम, शिसं, सेलेनिअम.. यासारखेही आरोग्यावर मोठा दुष्परिणाम करणारे पदार्थ या पावडरमध्ये होते.३- खास लहान मुलांसाठी तयार करण्यात आलेली ही पावडर म्हणजे जणू एक जहाल वीषच आहे असं मत प्रयोगशाळेच्या संचालकांनी व्यक्त केलं.