- मृण्मयी पगारे.कडूसर चवीची मेथीची भाजी अनेकांना जेवणात रोज दिली तरी चालते. इतकी मेथीची भाजी प्रिय आहे. मेथीच्या भाजीनं तोंडाला चव येते. इतकंच कशाला मेथीचं बी म्हणजे मेथ्या त्याही अनेक पदार्थांना चव आणतात. ताकाच्या कढीत फोडणीला मेथ्यांचे दाणे घातल्यास वेगळीच चव येते. डिंकाच्या लाडूत मेथ्यांची पावडर मिसळल्यास लाडूची चव आणि गुणवत्ता दोन्हीही वाढते. तसेच या मेथ्या भिजत घालून त्यांना मोड आणून आंबट गोड आणि थोडीशी कडूसर चवीची उसळही छान लागते. पण मेथीची भाजी आणि मेथ्या या काही फक्त खाण्यापुरत्याच नसून त्याचे अनेक औषधी गुणधर्मही आहे. तसेच सौंदर्याच्या संबंधित अनेक समस्यांवर मेथीची भाजी आणि मेथ्या या उत्तम औषधही आहेत.मेथी आणि आरोग्य * मेथीचा उपयोग ताप उतरण्यासाठी होतो.* पोटाच्या तसेच श्वसनाच्या विकारातही मेथीचा उपयोग होतो. * मेथीमध्ये खनिजं आणि जीवनसत्त्वं भरपूर प्रमाणात असतात. आणि म्हणूनच मेथी आणि मेथ्यांचा उपयोग खाण्यासोबतचं इतर अनेक कारणांसाठीही होतो. * अंगाला येणारी घामाची दुर्गंधी आणि मुखदुर्गंधी घालवण्यासाठी मेथीच्या पानाचा उपयोग खूपच फायदेशीर ठरतो. * मेथीच्या भाजीमुळे बाळांतिणीच्या दुधातही वाढ होते.
मेथी आणि सौंदर्य* सौंदर्योपचारातही मेथी आणि मेथ्यांचा उपयोग होतो. विशेषत: केसांच्या समस्यांसाठी मेथीचा उपयोग केल्यास फायदा होतो.* कोरड्या आणि गळणाऱ्या केसांना मऊसूत करण्यासाठी एक कप मेथीची पानं आणि एक कप किसलेलं खोबरं घ्यावं. दोन्हीही एकत्र वाटून त्याचा रस काढावा. हा रस केसांना हलक्या हातानं मसाज करत लावावा. पंधरा मिनिटा नंतर केस धुवावेत. * काळ्याभोर केसांसाठी एक कप ताजी मेथीची पानं आणि चार ते पाच गूसबेरी घ्याव्यात. दोन्हीही एकत्र वाटून त्याचा रस काढावा. आणि तो केसांना हलक्या हातानं मसाज करत लावावा. रस लावल्यानंतर साधारणत: पाऊण तासानं केस धुवावेत.* नुसती मेथ्यांची पानं रगडून त्यांचा रस काढून केसांना लावला तरी केसांचा पोत सुधारतो. * केसांना सतत कलर केल्यामुळे केस निर्जीव आणि शुष्क होतात. यासाठी पाव कप मेथ्या रात्रभर भिजत घालाव्या. थोडं पाणी टाकून मेथ्या वाटाव्या. सुती कापड वापरून मेथ्यांचा रस गाळून घ्यावा. मेथ्यांचा रस केसांना मसाज करत लावावा. आणि साधारणत: पाऊण तासानं केस धुवावेत. यामुळे केस मऊसूत होण्यास मदत होते. * चेहऱ्यावरच्या मुरूम आणि पुटकुळ्यांसाठी पाव कप मेथीची पानं आणि पाव कप तुळशीची पानं घ्यावीत. दोन्ही एकत्र वाटून त्याची पेस्ट करावी. आणि ही पेस्ट चेहेऱ्याला लावावी. ही पेस्ट त्वचेला संसर्ग झालेल्या ठिकाणी लावल्यास त्यावरही फरक पडतो.