विविध मागण्यांसाठी बहुजन समाज पार्टीचे धरणे आंदोलन
धुळे : महागाई कमी करा, पदाेन्नती, ओबीसी आरक्षण आणि बेरोजगारांना रोजगार द्या, यांसह इतर मागण्यांसाठी बहुजन समाज पार्टीने मंगळवारी धुळ्यात एक दिवसीय धरणे आंदोलन केले. बहुजन समाज पार्टीच्या पदाधिकाऱ्यांनी मंगळवारी सकाळी ११ वाजता धुळे शहरात क्युमाईन क्लब रस्त्यावर धरणे आंदोलन केले. यावेळी शासनाच्या जनविरोधी धोरणांचा निषेध करीत जोरदार घोषणाबाजी केली. मागासवर्गीयांचे पदाेन्नतीमधील संविधानिक आरक्षण बेकायदेशीरपणे रद्द केल्यामुळे मागासवर्गीय समाजावर अन्याय झाला आहे. मागासवर्गीय अधिकारी, कर्मचाऱ्यांना पदाेन्नतीपासून दूर ठेवण्याचे षडयंत्र रचल्याचा आरोप करण्यात आला.
यावेळी आंदोलकांच्या एका शिष्टमंडळाने जिल्हा प्रशासनाच्या मार्फत राष्ट्रपती, मुख्यमंत्री, उपमुख्यमंत्री, ऊर्जामंत्री, मुख्य सचिव यांना निवेदन दिले.
आंदोलनात जिल्हाध्यक्ष आनंद सैंदाणे, उपाध्यक्ष प्रदीप शिरसाठ, विजय मोरे, नाना शिंदे, सुरेश अहिरे, ॲड. संदीप जावरे, अजय गायकवाड, ईश्वर जाधव, भास्कर महिरे, चेतन वाघ, अनिल वाघ, मंगलदास वाघ, संगम बागुल, नरेश गांगुर्डे, ॲड. सतीश अहिरे यांच्यासह पदाधिकारी व कार्यकर्ते सहभागी झाले होते.
... या आहेत मागण्या
विशेष नोकर भरती मोहीम राबवून ४.५ लाखांचा बॅकलाॅग भरावा, ओबीसींना स्थानिक स्वराज्य संस्थांमधील आरक्षण पूर्ववत द्यावे, स्वयंपाकाचा गॅस, पेट्रोल, डिझेलच्या किमती कमी करून महागाई नियंत्रणात आणावी, कोरोनामुळे अनेक कुटुंबे बेरोजगार झाली असून, त्यांचे वीजबिल माफ करावे, बियाणे, खतांच्या किमती वाढवून शेतकऱ्यांची लूट करणाऱ्या कंपन्यांवर कारवाई करावी, पीक कर्जासाठी शेतकऱ्यांना वेठीस धरणाऱ्या अधिकाऱ्यांवर कारवाई करावी, त्यांना निलंबित करावे, प्रचलित १०० बिंदूनामावलीनुसार राज्यात शंभर टक्के प्राध्यापक भरती करावी, ॲट्राॅसिटीच्या गुन्ह्यातील आरोपी धीरज चाैधरी यास तत्काळ अटक करावी, आरोपीला अभय देणाऱ्या तपास अधिकाऱ्यांचे निलंबन करावे आदी मागण्या निवेदनात केल्या आहेत. या मागण्यांवर त्वरित कार्यवाही केली नाही तर तीव्र स्वरुपाचे आंदोलन छेडण्यात येईल, असा इशारा बहुजन समाज पार्टीने दिला आहे.