धुळे महानगरात शंभराहून अधिक इमारती धोकादायक

मनपाने काही वर्षांपूर्वी शहरातील जुन्या इमारतींचे सर्वेक्षण केले होते. त्यावेळी शहरात तब्बल १०५ धोकादायक इमारती असल्याचे समोर आले आहे. जुने धुळे, पेठ भाग व अन्य काही परिसरांमध्ये इंग्रजकालिन इमारती आहेत. त्यापैकी बहुतांश इमारतींची बांधकामे १०० वर्षांपेक्षा अधिक जुनी झाली आहेत. त्यापैकी बहुतांश धोकादायक इमारतींमध्ये नागरिकांचा रहिवास आहे. त्यामुळे पावसाळ्यात वादळी वारे व मुसळधार पाऊस झाल्यास धोकादायक इमारती कोसळल्यास वित्त व जीवितहानी होऊ शकते. धोकादायक इमारतींना मनपाकडून दरवर्षी अधिनियम १९४९ मधील इमारतीसंबंधी अधिनियम २६४ (१) नुसार नोटीस बजावणे क्रमप्राप्त आहे. मात्र, मनपाकडून दरवर्षी वृत्तपत्रात नोटीस देऊन नागरिकांना जीर्ण इमारत काढण्याचे आदेश दिले जातात. दरम्यान, बहुसंख्य धोकादायक इमारतींच्या मालकांनी इमारतीचे स्ट्रक्चरल ऑडिट करून महापालिकेला सादर केलेले दिसून येत नाही.