धुळे : सिन्नर तालुक्यातील पंचाळे येथील शेतकऱ्याची जमिनीच्या व्यवहारात फसवणूक केल्याची तक्रार धुळे शहर पोलीस ठाण्यात करण्यात आली. या प्रकरणी धुळ्यातील दोघांसह तिघांविरुद्ध गुन्हा दाखल झाला.
पंचाळे ता. सिन्नर येथील शेतकरी विवेक भागवत थाेरात याने शहर पोलीस ठाण्यात तक्रार दाखल केली. त्यानुसार, मे २०१२ मध्ये धुळ्यातील निरंजन भतवाल (रा. मालेगाव रोड, धुळे), आसिफ बशीरोद्दीन पिंजारी (रा. मुस्लीम नगर, चाळीसगाव रोड, धुळे) आणि त्यांच्या गावातील धनंजय कमलाकर थोरात (रा. पंचाळे, ता. सिन्नर) या तिघा संशयितांनी त्यांच्याशी जमिनीचा व्यवहार केला. पंचाळे कोळपेवाडी रोडलगत असलेली गट नंबर ३३१ ही १ हेक्टर ४१ आर ही शेतजमीन खरेदी करण्याचा व्यवहार झाला होता. एकूण ९५ हजार रुपये देण्याचे त्यांच्यात ठरले होते. त्यापैकी केवळ २० हजार रुपये दिले. उर्वरित ७५ हजार रुपये मिळत नसल्याने विवेक थोरात यांनी तगादा लावला असता त्यांना वेळोवेळी धनादेश देण्यात आले. तसेच अन्य ठिकाणी जमिनी देण्याचे सांगण्यात आले. अशातच ५ वर्षे गेली. त्यांनी दिलेले धनादेश वटत नसल्याने व व्यवहारातील मोठी रक्कम अडकून पडलेली असल्याने त्यांनी तगादा लावला असता २०१७ नंतर त्यांना कोणत्याही प्रकारचा प्रतिसाद मिळत नव्हता. व्यवहारानंतरही जमीन अद्याप विवेक थोरात यांच्याकडे असल्याने व त्यांना दुसरा व्यवहारदेखील करता येत नसल्याने या प्रकाराचा सोक्षमोक्ष लागावा म्हणून त्यांनी गुरुवारी शहर पोलीस ठाण्यात तक्रार दाखल केली. त्यानुसार, धुळ्यातील निरंजन भतवाल, आसिफ पिंजारी या दोघांसह पंचाळे येथील धनंजय थोरात या तिघांविरुद्ध भादंवि कलम १२० ब, ४२० प्रमाणे गुन्ह्याची नोंद करण्यात आली. घटनेचा तपास शहर पोलीस निरीक्षक नितीन देशमुख करीत आहेत.