धुळे : कृषी उत्पन्न बाजार समितीसमोर कॉलनी परिसरात फिरणाऱ्या नकली तृतीयपंथीयास पकडून बाहेरगावाहून आलेल्या अस्सल तृतीयपंथीयाने चांगलाच चोप दिला. ही घटना शिंदखेड्यातील भगव्या चौकात सोमवारी घडली. स्वत:ला सावरून नकली तृतीयपंथीयाने चांगलीच धूम ठोकली. यावेळी मोठ्या प्रमाणावर गर्दी जमा झाली होती.
सोमवारी लग्नाची मोठी तिथी असल्यामुळे बिजासनी मंगल कार्यालय, स्टेशन रोड आणि विरदेल रोडवरील काकाजी मंगल कार्यालय, मनमीरा मंगल कार्यालय या तिनही ठिकाणी कमालीची गर्दी होती. नेमका याचा फायदा घेत सकाळच्या वेळी दोंडाईचा येथील एका पुरुषाने तृतीयपंथीयाचा वेश परिधान करून भगवा चौकासमोरील कॉलनी परिसरात पैसे मागत फिरत होता. त्याच वेळेस स्टेशन रोडवरील बिजासन मंगल कार्यालयात जाण्यासाठी जमलेले अस्सल तृतीयपंथीय भगवा चौकात आल्यानंतर त्यांची भेट या नकली तृतीयपंथीयासोबत झाली. त्यांनी त्याला पकडून विचारणा केली. काही प्रश्न विचारल्यानंतर त्याला उत्तर देता येत नव्हते. त्यातून तो नकली असल्याचे समोर येताच तृतीयपंथीयांनी त्याला चांगलेच झोडपून काढले. त्यातून त्याने स्वत:ला सावरत त्यांच्या तावडीतून सुटून पळून जाण्यास यशस्वी ठरला.