लोकमत न्यूज नेटवर्क
धुळे : जिल्ह्यातील दोंडाईचा (ता. शिंदखेडा) व अमळनेर (जि. जळगाव) तालुक्यातील कमळमसरे येथील अल्पवयीन मुलींवर अत्याचार झाल्याच्या घटना नुकत्याच घडल्या आहेत. या दोन्ही घटना माणुसकीला काळीमा फासणा-या आहेत. अल्पवयीन मुलींवर अत्याचार करणा-या आरोपींवर तत्काळ कारवाई करावी, या मागणीसाठी सत्यशोधक जनआंदोलनच्या पदाधिका-यांनी मंगळवारी जिल्हाधिकारी कार्यालयात निदर्शने केली. यासंदर्भात प्रसिद्धीस दिलेल्या निवेदनात म्हटले आहे, की दोंडाईचा व कळमसरे येथील अल्पवयवीन मुलींवर झालेल्या अत्याचारामुळे त्या मुलींच्या शिक्षणाचा प्रश्न ऐरणीवर आला आहे. या दोन्ही घटनांचा निषेध आहे. याप्रकरणी दोषी आरोपींना तत्काळ अटक करून त्यांना कडक शिक्षा देण्यासाठी जलद न्यायालयात खटला चालवावा, अशी मागणी निवेदनात नमूद करण्यात आली आहे. यावेळी राकेश अहिरे, सिद्धांत बागुल, रोशन खैरनार, योगेश शिरसाठ, सुमेध सूर्यवंशी, चेतन नेरकर, मयूर सोनवणे, सनी शिरसाठ, भावेश हिरे, आकाश भामरे, आदित्य वसावे आदी उपस्थित होते.