धुळे : कोरोना महामारीपासून संरक्षण करण्यासाठी नागरिकांकडून लिंबूवर्गीय फळांची मागणी वाढली आहे. धुळ्याच्या बाजारपेठेत लिंबू, संत्री, मोसंबी, आल्यासह आवळ्याची प्रचंड मागणी वाढली आहे. या पाच वस्तूची प्रतिदिन ७० ते १०० टन आवक होत आहे.
दरम्यान, शेतकऱ्यांनी स्वत: टरबूज विक्री करण्यास सुरुवात केल्याने स्वस्त दरात मिळणाऱ्या टरबूजला मागणी वाढली आहे. सध्या आंब्यांचा सीझन असल्याने आंबे खरेदीदेखील बाजारात वाढली आहे.
धुळे शहरासह जिल्ह्यात कोरोनाचा संसर्ग कमी होत आहे. असे असले तरी नागरिकांनी कोरोना नियमांचे पालन करून स्वत:ची व कुटुंबीयांची काळजी घ्यावी, असे आवाहन शासन-प्रशासनातर्फे सातत्याने करण्यात येत आहे. तसेच व्हिटॅमिन सी चे प्रमाण जास्त असलेल्या फळांचा नियमित आहारात समावेश करावा. त्यामुळे रुग्णांची प्रतिकारशक्ती वाढविण्यासाठी मदत होते, असा सल्ला डाॅक्टरांकडून दिला जात आहे.
मार्च २०२० मध्ये कोरोनाचा संसर्ग सुरू झाल्यापासून आयुष मंत्रालय व इतर आरोग्य संस्थांनीही कोरोनापासून वाचण्यासाठी रोगप्रतिकारकशक्ती वाढविण्यावर भर देण्यास सांगितले आहे. व्हिटॅमिन सी असलेली फळे खाण्याचा सल्ला दिला जात असल्याने वर्षभरापासून लिंबूसदृश फळांना मागणी वाढली आहे. त्यामुळे या फळांच्या दरातदेखील वाढ झाली आहे. दरवाढ सामान्यांना परवडणारी नसली तरी आरोग्यासाठी सामान्यांकडून मोठ्या प्रमाणात खरेदी होत आहे. परंतु हातावर पोट असणाऱ्या कामगार, कष्टकऱ्यांना व्हिटॅमिन सी आणि या फळांबद्दल किंवा आहाराबद्दल परिस्थितीमुळे माहिती करून घेण्याचीही गरज वाटत नाही.
कोरोना विषाणूला नियंत्रणात आणण्यासाठी एकीकडे शासन आपल्या पातळीवर प्रयत्न करत असताना सामान्य जनता आपापले घरगुती काढे, ज्यूस, औषधोपचारही करताहेत. कोरोना काळात दररोज लिंबू, संत्री, मोसंबी ही फळे खाणे गरजेचे असल्याचे डाॅक्टरांचे मत आहे. तसेच उन्हाळ्यात ही फळे खाल्ल्याने पाण्याचे प्रमाण स्थिर असते.
फळांच्या किमतीत २५ टक्क्यांनी वाढ
कोरोनाच्या आजारावर उतारा म्हणून या फळांकडे पाहिले जात असले तरी मागणीच्या तुलनेत पुरेशा प्रमाणात त्याची उपलब्धता नसल्याने फळांच्या किमतीत २५ टक्क्यांनी वाढ झाली असल्याचे फळ विक्रेते सांगतात. वीकेंड लाॅकडाऊनमुळे फळांचा बाजारही बंद आहे. लिंबू ३०० ते ३५० रुपये किलो, मोसंबी ९० ते ११० रुपये आणि संत्री ८० ते १०० रुपये किलोचा दर गाठला आहे.