जुनवणे गावाजवळ बसच्या धडकेत दुचाकीस्वार जागीच ठार

अपघातानंतर बस रस्त्यालगत पलटी झाली, बसमधील ४ प्रवाशी जखमी

ठळक मुद्देधुळ्याहून चाळीसगावडे बस जात होतीअपघातानंतर चालकाचे बसवरील नियंत्रण सुटलेबस रस्त्यालगत पलटी झाली

लोकमत न्यूज नेटवर्कधुळे : दुचाकीला धडक दिल्यानंतर बस रस्त्यालगत पलटी झाली.  या अपघातात दुचाकीस्वार जागीच ठार झाला. तर बसमधील चार प्रवाशी किरकोळ जखमी झाले. हा अपघात चाळीसगाव रोडवरील जुनवणे गावाजवळ आज दुपारी झाला.धुळे आगाराची बस धुळ्याहून चाळीसगावकडे जात होती. जुनवणे गावाजवळ बसने दुचाकीला (क्र. एमएच १८-अ‍ेआर ६४८०) जोरदार धडक दिली. ही धडक एवढी भीषण होती, की अपघातात दुचाकीस्वार रवींद्र पाटील (३५, रा. लोणखेडी) हा जागीच ठार झाला. तर दुचाकीवर मागे बसलेला गणेश पाटील हा जखमी झाला.दुचाकीला धडक दिल्यानंतर बस रस्त्यालगत पलटी झाली. यात बसमधील चार प्रवाशी किरकोळ जखमी झाले. बसमध्ये जास्त प्रवाशी नसल्याने, मोठी जीवीतहानी टळल्याचे ग्रामस्थांचे म्हणणे आहे. या जखमींना तत्काळ धुळे जिल्हा रूग्णालयात दाखल करण्यात आले. अपघाताचे वृत्त समजताच धुळे आगाराचे अधिकारी घटनास्थळी रवाना झाले होते. या अपघाताची उशिरापर्यंत नोंद झालेली नव्हती.