धुळे : शिंदखेडा तालुक्यातील वायपूर ते खलाणे रस्त्यावरून भरधाव वेगाने जाणाऱ्या दुचाकीस्वाराने रस्त्यावरून जाणाऱ्या कुत्र्याला वाचविण्याच्या नादात पायी जाणाऱ्या दोघांना जोरदार धडक दिली. त्यातील एक गंभीर जखमी झाल्याने उपचार घेताना मृत्यू झाला. इच्छाराम नारण छावणी असे मयत व्यक्तीचे नाव आहे.
राकीबूल शेख मिनारूल यांनी फिर्याद दाखल केली. त्यानुसार, शिंदखेडा तालुक्यातील खलाणे येथील इच्छाराम नारण छावणी (वय २३, रा. छावणी निवास, जि. बानकुडा, पश्चिम बंगाल) आणि राकीबूल शेख मिनारूल हे दोघे शिंदखेडा तालुक्यातील वायपूर गावाकडून खलाणे गावाकडे रस्त्याने १ जानेवारी रोजी सायंकाळी ७ वाजेच्या सुमारास पायी जात होते. त्याच वेळेस एमएच १९ इबी ९३३५ क्रमांकाची दुचाकी भरधाव वेगाने आली आणि पायी चालत जात असणारे इच्छाराम नारण छावणी आणि राकीबूल शेख मिनारूल या दोघांना दुचाकीची धडक बसली. यात दोघेही रस्त्यावर फेकले गेले. डोक्यासह हाता पायाला त्यांना दुखापत झाली. दोघांनाही तातडीने रुग्णालयात उपचारासाठी दाखल करण्यात आले. उपचार सुरू असताना इच्छाराम नारण छावणी यांचा मृत्यू झाल्याचे डाॅक्टरांनी घोषित केले. राकीबूल शेख मिनारूल यांच्यावर उपचार सुरू आहेत. शिंदखेडा पोलिस ठाण्यात अपघाताची नोंद रविवारी करण्यात आली.