घरासमोर लावलेली दुचाकी झाली लंपास
उस्मानाबाद : तालुक्यातील ढोकी येथील शाहबाज जाफर कुरेशी यांनी त्यांच्याकडील एमएच २५ एएच ३६२० क्रमांकाची दुचाकी रविवारी (दि. २५) रात्री दत्तनगरातील आपल्या घरासमोर लावली होती. दरम्यान, सोमवारी सकाळी ती लावलेल्या जागेवर आढळून आली नाही. शोध घेऊनही ती न सापडल्याने कुरेशी यांनी ढोकी ठाण्यात धाव घेत तक्रार दिली. त्यानुसार अज्ञात चोरट्यावर गुन्हा दाखल झाला आहे.
३३ ग्रॅम सोन्यासह मोबाईल नेले चोरून
उस्मानाबाद : कळंब तालुक्यातील भाटशिरपुरा येथे घरफोडीची घटना सोमवारी (दि. २६) उघडकीस आली आहे. येथील सुमित गायकवाड यांचे घर बंद होते. या घराचा कडी-कोयंडा तोडून चोरट्यांनी आत प्रवेश केला. यानंतर घरात ठेवण्यात आलेले ३३ ग्रॅम वजनाचे सोन्याचे दागिने तसेच दोन मोबाईल या चाेरट्यांनी पळवून नेले. सोमवारी हा प्रकार लक्षात आल्यानंतर त्यांनी शिराढोण ठाण्यात धाव घेत तक्रार दिली. त्यानुसार पोलिसांनी गुन्हा दाखल केला आहे.
भांडणातून दोघांना कंबरपट्ट्याने मारहाण
उस्मानाबाद : जुन्या भांडणाच्या वादातून दोघांना सोमवारी (दि. २६) चिवरी येथे कंबरपट्ट्याने मारहाण झाली. सांगवी (मा.) येथील अनिल पवार व योगेश कोळी यांना नळदुर्ग येथील जरार कुरेशी व अनोळखी पाचजणांनी चिवरी येथे मारहाण केली. नंतर कारमध्ये बसवून अक्कलकोट रस्त्यावर नेत तेथेही मारहाण करून जिवे मारण्याची धमकी दिली. याबाबत नळदुर्ग ठाण्यात गुन्हा दाखल करण्यात आला आहे.