उस्मानाबाद : गेली दोन वर्षे जिल्ह्यावर अतिवृष्टी अन् कोरोनाच्या विघ्नाने कहर केला. त्यात सण-उत्सवही भरडले गेले. आता कोरोनाचे विघ्न काहीअंशी कमी झाल्याने निर्बंधात का होईना बाप्पांचा उत्सव साजरा करण्यास परवानगी मिळाली आहे. त्याचा उत्साह शुक्रवारी उस्मानाबादेत पहायला मिळाला. तोंडावर मास्क लावून बाळगोपाळांचा जत्था बाजारपेठेत बाप्पांना घरी नेण्यासाठी आतूर असलेला दिसला. यंदा मिरवणुकीला परवानगी नव्हती. त्यामुळे वाजत का नसेना, पण गाजत बाप्पा घरोघरी व सार्वजनिक ठिकाणी विराजमान झाले.
गणेशस्थापनेच्या निमित्ताने गुरुवारी सायंकाळपासूनच बाजारपेठेत मोठी लगबग दिसून येत होती. मूर्ती विक्रीसाठी स्टॉल सजविण्यात येत होते. सजावटीच्या साहित्याने दुकाने सजली होती. बाप्पाच्या उत्सवाचा माहोल तयार झाला होता. शुक्रवारी सकाळ उजडताच अगदी ७ वाजेपासून रस्त्यांवर गर्दी होताना दिसून आली. एरवी मॉर्निंग वॉकर्सनी फुलणारे रस्ते शुक्रवारी बाळगोपाळ अन् ज्येष्ठ नागरिकांनी भरलेले दिसले. मूर्ती तसेच सजावटीचे व पुजेचे साहित्य साहित्य आणण्यासाठी शहरातील छत्रपती शिवाजी महाराज चौक, नेहरू चौक, राजमाता जिजाऊ चौक, सांजा नाका, ज्ञानेश्वर मंदिर भागात गणेशभक्तांची लगबग वाढली होती. सकाळी ९ वाजेनंतर मात्र बाजारात मोठी गर्दी उसळली. सुरक्षित अंतराचा नियम पाळला गेला नाही. मात्र, यातील अनेकांनी मास्कचा वापर केलेला दिसून आला.
मूर्ती लहान, किंमत महान...
यंदा सार्वजनिक मंडळांनाही ४ फुट उंचीच्या मूर्तीचे बंधन असल्याने बाजारात यापेक्षा मोठ्या मूर्ती दिसून आल्या नाहीत. दरवर्षीपेक्षा प्लास्टर ऑफ पॅरिसचा वापरही मूर्तीसाठी कमी झाल्याचे दिसले. मर्यादित उंचीमुळे मूर्तीकारांनी लहानच पण अतिशय मेहनत घेऊन सुबक मूर्ती तयार केल्या होत्या. त्यामुळे स्वाभाविकच किमतीही वाढल्या. अर्धा फूट ते ४ फूट उंचीच्या मूर्ती बाजारात होत्या. त्यांची किमत १०० रुपयांपासून ते ५ हजार रुपयांपर्यंत होती. गतवर्षीच्या तुलनेत दर दीडपट अधिक होते.
बाजारपेठ फुलली...
जवळपास दीड वर्षानंतर बाजारपेठेत एखाद्या उत्सवाचा इतका उत्साह पहिल्यांदा पाहायला मिळाला. गणरायांच्या पूजेसाठी लागणा-या दुर्वा, मका विविध प्रकारची फळे, फूले, पुष्पहार, मखर, पाटे, रांगोळी, रंगीत दिव्यांच्या माळा यासह विविध प्रकारच्या सजवटीच्या साहित्यांनी अन् त्यांच्या खरेदीसाठी दुकाने गजबजली होती. तसेच गणरायांच्या नैवेद्यासाठी मिठाई दुकानातही चांगलीच गर्दी उसळल्याचे पाहायला मिळाले.